İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 130 Hüküm no: 115 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap esnafından ölenlerin borçlarını diğer kasap dükkanı gedik sahiplerinin ortaklaşa ödemeleri Ma‘rûz Evkâf-ı Hazret-i Ebâ Eyyûbe’l-Ensârî -radiye anhu Rabbühü’l-Bârî’-den İstanbul’da Karagümrük’de kuyu karşısında vâki‘ bir bâb kasab dükkânı derûnunda mevcûde beyne’l-hıref gedik ta‘bir olunur âlât-ı lâzıme-i ma‘lûmenin mutasarrıfı olup bundan akdem vefât eden Emir Mehmed’in zikri âtî husûsunu rü’yete vasî ta‘yin olunan medîne-i Eyüb kassâbânı kethüdâsı Ebubekir Ağa meclis-i şer‘-i kavîmde yine kasab ustalarından el-Hâc Mehmed b. Ali muvâcehesinde takrîr-i kelâm edip bundan akdem kıbel-i şer‘den verilen i‘lâmda beyân olduğu üzre kasab ustalarından biri celeb tâ’ifesine olan düyûnunu kable’l-edâ fevt oldukda düyûnuna vâfiye terekesi yok ise mutasarrıf oldukları gedikleri bedel-i misli ve ma‘rifet-i mütevellî ile âhara ferâğ ve bedeli ile celebâna olan düyûnu edâ olunmak bâ-emr-i âlî şurût-ı mer‘iyyeden olup ve müteveffâ-yı mezbûrun gedik-i mezkûrdan gayrı düyûn-ı mezkûresine vâfiye terekesi olmayıp şurût-ı mezkûre üzre celeb tâ’ifesine olan düyûnunu ba‘de’s-sübût edâ içün gedik, beyne’l-esnâf müzâyede olundukda mezbûr el-Hâc Mehmed üzerinde bin iki yüz altmış beş guruş bedelde karâr edip ziyâde ile tâlib-i âharı zuhûr etmemekle ben dahî ber-vech-i muharrer âlât-ı mezkûreyi bin iki yüz altmış beş guruş bedel mukâbelesinde bâ-re’y-i mütevellî vakf-ı mezbûr el-Hâc Mehmed’e bi’l-vesâye ferâğ ve kasr-ı yed eylediğimde ol dahî ber-vech-i muharrer tefevvüz ve kabûl eyledi dedikde mezbûr el-Hâc Mehmed dahî ba‘de’t-tasdîk âlât-ı mezkûre mezbûr el-Hâc Mehmed üzerine tahrîr ve defter-i vakfa kayd birle yedine müceddeden temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî sene 1202.