İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 131 Hüküm no: 116 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çocuksuz ölen Mehmed Emin Efendi b. el-Hâc Mustafa’nın evinin yarısı Zekeriya Efendi Vakfı’na diğer yarısı ise Emine Hatun Vakfı’na verilmesi Ma‘rûz Sâdır olan fermân-ı âlîlerine imtisâlen nezâret-i dâ‘îlerinde olan evkâfdan merhûme Emine Hatun Vakfı mütevelliyesi Bahrî Hatun bt. Abdullah tarafından husûs-ı âtîde vekîl olduğu zâtını ârifân Abdülbaki Efendi b. Abdullah ve Ebubekir b. el-Hâc Halil şehâdetleriyle sâbit olan el-Hâc Hüseyin b. Süleyman nâm kimesne nezâret-i hazret-i şeyhülislâmîde âsûde evkâf müfettişi müderrisîn-i kirâm-i zevi’l-ihtirâmdan İsmail Salih Efendi ile bi’l-ma‘iyye akd olunan meclis-i şer‘-i kavîmde şeyhülislâm-ı esbak merhûm Zekeriya Efendi Vakfı’nın bi’l-fi‘il mütevellîsi sâhib-i arzuhâl umdetü’l-mevâliyi’l-izâm Numan Efendi muvâcehesinde bi’l-vekâle takrîr-i kelâm edip medîne-i Üsküdar’da Rum Mehmedpaşa mahallesinde vâki‘ etrâf-ı erba‘adan Debbâğ es-Seyyid Hasan ve Çörekçi Mustafa Odabaşı ve Hâce Hatun menzilleri ve tarîk-i âm ile mahdûd müştemilât-ı ma‘lûmeyi hâvî beher şehr otuz akçe icâre-i mü’ecceleli bir bâb menzile bâ-icâreteyn mutasarrıf olan Mehmed Emin Efendi b. el-Hâc Mustafa bilâ veled vefât edip menzil-i mezkûr mahlûl ve cânib-i vakfa â‘id olmuşdur deyü müvekkilem mütevelliye-i mezbûre menzil-i mezkûru icâreteyn-i misleteyn ile âhara îcâr murâd ettikde mütevellî-i mûmâileyh Numan Efendi menzil-i mezkûr fi’l-asl birbirine muttasıl iki bâb menzil olup bir tarafdan yine Zekeriya Efendi Vakfı’ndan Debbâğ Hasan menzili ve bir tarafdan Hâce Emetullah Hatun menzili ve bir tarafdan mezbûre Emine Hatun Vakfı’ndan olan menzil ve bir tarafdan [30a] tarîk-i âm ile mahdûd beher şehr otuz akçe mü’ecceleli mahalli Zekeriya Efendi Vakfı’ndan ve mâ‘adâ mahalli dahî Emine Hatun Vakfı’ndan olup mutasarrıfı olan müteveffâ-yı mezbûr Mehmed Emin Efendi icâre-i mezkûrelerini ile’l-vefât vakfeyn-i mezkûreyne edâ ve teslîm edip öteden beru bu vecihle tasarruf olunagelmekle menzil-i mezkûr mahall-i mahdûd-ı mezkûrîn Zekeriya Efendi Vakfı’ndan olmak üzere bi’t-tevliye ben icâr ederim deyü da‘vâ eyledikde ben dahî inkâr etmemle müdde‘î-i mûmâileyhin ber-vech-i muharrer müdde‘âsına İbrahim Efendi b. Abdullah ve Molla Ömer b. Hüseyin ve es-Seyyid Mehmed ve Süleyman b. Abdullah nâm kimesneler edâ-i şehâdet edip şuhûd-ı mezbûrûn kable’t-ta‘dîl ve’t-tezkiye hâl-i mütevellî-i müdde‘î-i mûmâileyh Numan Efendi’nin takrîr-i meşrûhu üzre olduğu vukûf-ı tâmmı olan bî-garaz kimesnelerden ihbârıyla zâhir ve müvekkilem mütevelliye-i mezbûrenin ma‘lûmu olmağla menzil-i mezkûrun Zekeriya Efendi Vakfı’ndan olan mahallini mûmâileyh Numan Efendi ve Emine Hatun Vakfı’ndan olan mahallini dahî müvekkilem mütevelliye-i mezbûre icâreteyn-i misleteyn ile âhara îcâr etmek üzere her birimiz müte‘ahhid ve müterâzı olduk dedikde mütevellî-i mûmâileyh Numan Efendi dahî tasdîk edip bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî gurre-i B. sene 1202.