İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 132 Hüküm no: 117 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âişe bt. Musa’nın su kuyusuna yakın bir vakıf arsasına ev yaptığı için suyun kirlenmemesi için kuyunun etrafının duvarla çevirmesinin tenbih olunduğu Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel Ahmed Efendi hâssa mi‘mârı hulefâsından Mehmed Akif ve Mustafa Halîfeler ile İstanbul’da Süleymâniye kurbünde Hoca Gıyaseddin mahallesinde vâki‘ tarîk-i hâssa varıp huzûr-ı Müslimînde ba‘de akdi’l-meclis ashâb-ı arzuhâl merhûme Hâce Mâh-ı Nigar Hatun Vakfı’nın evlâdiyet ve meşrûtiyet üzre mütevelliyesi ve zâtı ta‘rîf-i şer‘î ile mu‘arrefe olan Emetullah Hatun bt. İsmail ile tarîk-i hass-ı mezkûr erbâbından İsmail Hakkı Efendi b. el-Hâc İbrahim ve Hasan Ağa b. Mehmed ve Ahmed Efendi b. Mehmed ve Ahmed Odabaşı b. Mehmed ve es-Seyyid Mehmed Said Ağa b. Ahmed ve Nimetullah Ağa b. el-Hâc Süleyman nâm kimesneler meclis-i ma‘kûd-ı mezkûrda tarîk-i hâss-ı mezkûrda vakf-ı mezbûr musakkafâtından iki kıt‘a temessük ile bir bâb menzile bi’l-icâreteyn mutasarrıfe olan derûn-ı arzuhâlde ismi mezkûr İsmail nâm kimesnenin vâlidesi ma‘rifetü’z-zât Âişe bt. Musa nâm hatun mahzarında merhûme mezbûre Hâce Mâh-ı Nigâr Hatun ahâlî-i mahallenin isti‘mâl ve suyundan intifâ‘larıçün mezbûre Âişe’nin menzili ittisâlinde hasbeten lillâhi te‘âlâ hafr eylediği bi’r-i mânın hevâsında kable’l-harîk binâ olmayıp üç tarafı vâsi‘ ve taş duvar iken ba‘de’l-harîk mezbûre Âişe Hatun bi’r-i mâ’-i mezkûr hevâsına menzil binâ eylediğinden mâ‘adâ etrafına taş duvar binâ etmeyip ve bi’r-i mâ’-i mezkûr içün terk olunan arsayı menziline zam ve ilhâk ve üç tarafına tahta perde binâ ile hâlâ bi’r-i mâ’-i mezkûrun etrâfı tûlen ve arzen bir zirâ‘ yirmişer parmak olup çıkrık vaz‘ ve isti‘mâl müte‘assir olmağla menziline zam eylediği arsadan keff-i yed ve hevâsında olan binâsını kal‘ ve ref‘a mezbûre Âişe’ye tenbîh olunmak matlûbumuzdur [30b] dediklerinde mezbûre Âişe Hatun dahî bi’r-i mâ’-i mezkûr mahalline menzilinin bir tarafından yirmi parmak ve bir tarafdan dahî altı parmak arza zımnında tûlen iki zirâ‘ on altı parmak ve arzen iki zirâ‘ iki parmak tevsî‘ ve bâlâsına tavan ve tahta perde zahrına Frengî taş duvar binâ etmek üzre ta‘ahhüd eyledikde mütevelliye-i mezbûre ile ahâlî-i mezbûrûn dahî râzı ve ber-vech-i muharrer ve hevâ da‘vâsından fâriğ ve bu vecihle kat‘-ı münâza‘a eylediklerini mevlânâ-yı mezbûr ma‘an mürsel ümenâ’-i şer‘le meclis-i şer‘a ba‘de’l-inhâ huzûr-ı âlîlerine i‘lâm olundu. Fî 8 min Recebi’l-ferd sene 1202.