İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 133 Hüküm no: 118 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah’ın yemişçi dükkanı kira bedelinden fazla para alıp vefat eden el-Hâc Abdurrahman Efendi’nin varislerinden fazla alınan parayı talep ettiği Ma‘rûz Sâhib-i arzuhâl Abdullah b. el-Hâc Selim meclis-i şer‘-i kavîmde arzuhâlde mezkûrü’l-ism Mehmed Efendi b. Nâzırzâde el-Hâc Abdurrahman Efendi muvâcehesinde takrîr-i kelâm edip İstanbul’da Yemiş İskelesi’nde Yoğurtcu sûkunda vâki‘ bir bâb yemişci mahzeni merkûm el-Hâc Abdurrahman Efendi’nin tasarrufunda ve derûnunda mevcûde gedik tabîr olunur âlât-ı lâzıme-i ma‘lûme babam merkûmdan ırsen ve karındaşım Hâfız Salih’den şirâ’en benim mülküm olup merkûm el-Hâc Abdurrahman Efendi mahzen-i mezkûru bin yüz doksan senesi Şa‘bân’ı gurresinden beher şehr dörder guruş kirâ ile bana îcâr edip gedik-i mezkûrda kat‘â alâkası yoğiken seni ihrâc ederim deyü gedik-i mezkûr ibkâsiçün târîh-i mezkûrdan on sene tamâmına değin beher şehr edâ eylediğim dörder guruş kirâdan mâ‘adâ fuzûlî üç yüz seksen dokuz buçuk guruşumu ahz u istihlâk ve kable’z-zâmin fevt olmağla tereke-i vâfiyesini kabz eden oğlu mezbûr Mehmed Efendi’den taleb ederim deyü eylediği da‘vâsından bâ-vesâtat-ı muslıhîn mezbûr Mehmed Efendi ile yüz guruş bedel-i makbûza ba‘de’s-sulh ve’l-kabûl müdde‘î-i mezbûr Abdullah ziyâde müdde‘âsına ve mezbûr Mehmed Efendi dahî bedel-i sulh-ı mezkûr yüz guruşa müte‘allika âmme-i da‘vâdan âharın zimmetini ibrâ’-i âm ile ibrâ ve iskât ve her biri âharın ibrâ’-i mezkûrunu kabûl edip bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 13 min Recebi’l-ferd sene 1202.