İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 133 Hüküm no: 119 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küka v. Andon’ın Lefter v. Yorgi’den satın aldığını iddia ettiği kasap gediği hissesi davasında haksız bulunduğu Ma‘rûz Sâdır olan fermân-ı âlîlerine imtisâlen arzuhâl eden Küka v. Andon nâm zimmî Harameyn-i Şerîfeyn Müfettişi umdetü’l-müderrisîni’l-kirâm es-Seyyid Abdülhalim Efendi ile bi’l-ma‘iyye akd olunan meclis-i şer‘-i kavîmde evkâf-ı hazret-i şehriyârî mütevellîsi hâcegân-ı dîvân-ı hümyûndan Mehmed Efendi tarafından vekîli Ahmed Ağa b. Ömer hâzır olduğu hâlde zikri âtî kasab gediği âlâtına bâ-temessük-ı mütevellî vaz‘-ı yedi mütehakkık olan arzuhâlden mezkûrü’l-ism Lefter v. Yorgi zimmî muvâcehesinde takrîr-i kelâm edip evkâf-ı müşârunileyhden İstanbul’da Lanka Yenikapısı dâhilinde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme mezbûr Lefter ile benim bi’l-münâsafa iştirâken tasarrufumuzda [31a] iken mersûm nısf hisse-i şâyi‘a-i mezkûremi fuzûlî zabt ve tasarrufuma mumâna‘at eder deyü ba‘de’d-da‘vâ ve’l-istintâk mersûm Lefter zimmî cevâbında müdde‘î-i mesfûr Küka zimmî nısf hisse-i mezkûresini bin yüz doksan altı senesi Cumâde’l-âhiresi’nin on beşinci günü beş yüz on guruş bedel-i makbûz mukâbelesinde bâ-re’y-i mütevellî bana ferâğ ve tefvîz eyledikden sonra on beş gün mürûrunda Kosta nâm zimmîye dahî ferâgat etmekle mersûm Kosta nısf âlât-ı mezkûre benim hakk-ı mufavvazımdır deyü İstanbul kadısı esbâk Arabzâde Mehmed Sâdık Efendi’nin ba‘dehû Müftizâde Ahmed Efendi’nin huzûrlarında benden da‘vâ ettikde ben dahî mersûm Küka zimmî ber-vech-i muharrer on beş gün mukaddem bana ferâğ ve tefvîz eylediğini şuhûd-ı udûl ile isbât edip mersûm Kosta mu‘ârazadan men‘ olundukdan sonra müdde‘î-i mersûm Küka zimmî dahî târîh-i mezkûrda hisse-i mezkûresini bana ferâğını ikrâr ve i‘tirâf edip lâkin bedel-i mezkûrda noksan fâhiş olmağla bedel-i misline iblâğ yâhûd bedel-i mezkûru yedimden ahz ve nısf alât-ı mezkûreyi bana teslîm eylesin deyü İstanbul kadısı esbâk Mustafa Beyefendi huzûrunda benden eylediği da‘vâsı meşrû‘a ve mu‘tebere olmamağla müdde‘î-i mersûm dahî mu‘ârazadan men‘ olunmuşidi deyü takrîrine muvâfık üç kıt‘a i‘lâm-ı şer‘î ibrâzı ile ba‘de’d-def‘ ve’s-suâl ve’l-inkâr dâfi‘-i mersûm Lefter zimmî ber-vech-i muharrer def‘-i mezkûrîni udûlden hâlâ kasablar kethüdâsı el-Hâc Ali Ağa ve Mehmed Ağa nâm kimesneler şehâdetleriyle mesfûr Küka zimmî muvâcehesinde vech-i şer‘î üzre isbât etmeğin mûcebiyle müdde‘î-i mesfûr Küka zimmî bu def‘a dahî bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî gurre-i Recebi’l-ferd sene 1202.