İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 135 Hüküm no: 121 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefîse Hatun bt. Abdullah’a ait suyolu, çeşme ve arsaya zarar veren es-Seyyid Abdullah Efendi’nin sulh yoluyla anlaştığı Ma‘rûz Bâ-işâret-i aliyye sâdır olan fermân-ı âlîlerine imtisâlen sâhibât-ı arzuhâlden ma‘rifetü’z-zât Nefîse Hatun bt. Abdullah husûs-ı âtîde kendiden asâleten ve Saliha Hatun bt. el-merhûm Abdülhamid Efendi ile sadriye kebîre kerîmeleri Hafize Hanım ve Emine Hanım bt. el-merhûm Abdülvehhab Efendi taraflarından vekîlleri olmağla vekâleten nezâret-i hazret-i şeyhülislâmide âsûde evkâf müfettişi fahrü’l-müderrisîni’l-kirâm İsmail Salih Efendi ile bi’l-ma‘iyye akd olunan meclis-i şer‘-i münîrde arzuhâlde mezkûrü’l-ism umdetü’l-mevâlî’l-i‘zâm [31b] mevfiyan? medîne-i Edirne kadısı es-Seyyid Abdullah Efendi b. Mehmed muvâcehesinde takrîr-i kelâm edip müvekkilât-ı mûmâileyheynin cedleri şeyhülislâm-ı esbâk merhûm Ahmed Efendi Hazretlerinin vakfından olup medîne-i Üsküdar’a muzâfa Kanlıcak karyesinde vâki‘ bahçe derûnunda kâ’in bi’r-i mâ’nın suyu kadîmden beru tulumba ve lerzî ve terâzü ile civârında kâ’in yalı ta‘bîr olunur menzilimize icrâ olunugelip tulumba ve mecrâsı külliyen harâb olmağla bâ-izn-i mütevelliye kadîmi misillü mülkümüz olmak üzre bi’r-i mezkûre vaz‘ ve mecrâsına ferş ve binâ eylediğimiz iki yüz elli guruş kıymetli tulumba ve lerzîleri ve terâzüyü mezbûr es-Seyyid Abdullah Efendi fuzûlî hedm ve ref‘ ve tulumba ağacını şak etmekle kıymet-i mezkûrelerini mezbûr es-Seyyid Abdullah Efendi’den tazmîn taleb ederim deyü da‘vâ eylediğimde ol dahî inkâr etmekle beynimizde ba‘de vukû‘i’l-münâza‘a bâ-vesâtat-ı muslıhîn ben da‘vâ-i mezkûremden mezbûr es-Seyyid Abdullah Efendi ile yüz elli guruş bedel-i makbûza ba‘de’s-sulh ve’l-kabûl ziyâde müdde‘âma müte‘allika âmme-i da‘vâdan mezbûr es-Seyyid Abdullah Efendi’nin zimmetini ibrâ’-i âm ile ba‘de’l-ibrâ ve’l-kabûl yedimde olan işbu i‘lâm-ı şer‘î nâtık olduğu üzre karye-i mezbûrede vâki‘ bir tarafdan merhûm-ı mûmâileyh Ahmed Efendi Vakfı’ndan Ümmügülsüm Hanım tasarrufunda olan sâhilhâne ve bir tarafdan mezbûr es-Seyyid Abdullah Efendi’nin sâhilhânesi ve tarafeyni tarîk-i âm ile mahdûd ve bi’r-i mâ’yı hâvî terbî‘an doksan altı zirâ‘ menzil arsası irsen mülkümüz iken mezbûr es-Seyyid Abdullah Efendi fuzûlî zabt ve menziline zam ve ilhâk üzerine matbah binâ etmekle mezbûr es-Seyyid Abdullah Efendi’den taleb ve da‘vâ eylediğimizde yine irsen bizim mülkümüz olmak üzere hükm-ı şer‘î lâhık olan arsa-i mahdûde-i mezkûreyi üç yüz elli guruş semen-i makbûza tarafeynden bi’l-îcâr ve’l-kabûl bâtten ve sahîhan mezbûr es-Seyyid Abdullah Efendi’ye bi’l-asâle ve bi’l-vekâle bey‘ ve temlîk ve teslîm ol dahî ber-vech-i muharrer iştirâ ve temellük ve tesellüm ve kabûl edip fîmâ ba‘d arsa-i mezkûrede benim ve müvekkilât-ı mûmâileyhin aslâ ve kat‘â alâka ve medhalimiz kalmayıp mebî‘-i mezkûrun ta‘zîr ve gabnına müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskât ve her birimiz âharın ibrâsını kabûl eyledik dedikde mezbûr es-Seyyid Abdullah Efendi dahî mukırra-i mûmâileyhâyı tasdîk edip bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 19 min Recebi’l-ferd sene 1202.