İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 136 Hüküm no: 122 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâfız Mustafa ve Fatma Hatun’un çorbacı dükkanı ile Tabib Kabril’in tabib dükkanına kira bedeli sebebiyle zulm eden Teberdâr Mustafa’nın uyarılması Ma‘rûz Sâdır olan fermân-ı âlîlerine imtisâlen ashâb-ı arzuhâl İstanbul’da Dîvânyolu’nda Dikilitaş’da Vâlide Hamâmı kurbünde vâki‘ fevkânî bir bâb odayı hâvî bir bâb tabîb dükkânı ve bir bâb çorbacı dükkânı altmış sehm i‘tibârıyla yedi buçuk sehmine mutasarrıf olup husûs-ı âtîde kendiden asîl ve yedişer buçuk sehimlerine mutasarrıfân li-ebeveyn karındaşları Hâfız Mustafa ve Fatma Hatun bt. el-Hâc Süleyman tarafından vekîl olduğu zât-ı mezbûreyi ârifân el-Hâc İbrahim b. İsmail ve Hasan Ağa b. Osman şehâdetleriyle sâbit olan Hâfız Mehmed Efendi b. el-mezbûr el-Hâc Süleyman ve yedi buçuk sehmine mutasarrıf İbrahim Bey b. İsmail tarafından vekîl olduğu sâbit [olup] mezbûr [32a] Hasan Ağa b. Abdullah şehâdetiyleriyle sâbit olan es-Seyyid Ahmed Ağa b. Osman ve on beş sehmine mutasarrıfa Esbere Hatun bt. Abdullah tarafından vekîl olduğu zâtını ârifân şâhidân-ı mezbûrân şehâdetleriyle sâbit olan el-Hâc Mehmed b. Hüseyin’den her biri meclis-i şer‘-i kavîmde dükkân-ı mezkûrda müşâhereten müste’cirleri Tabib Kabril zimmî v. Salman hâzır olduğu hâlde arzuhâlde mezkûrü’l-ism Teberdâr Mustafa b. Ömer ile terâfu‘larında mezbûr Teberdâr Mustafa mârrü’z-zikr iki bâb dükkân ve odaya bir gedik olmak üzere rağbet vermişidim deyü müste’cirimiz mersûmu gedik kirâsı talebiyle ta‘cîz ve bizim zabtımıza mumâna‘at ve müdâhale eder suâl olunup müdâhalesini men‘ ve def‘ olunmağla bi’l-asâle ve bi’l-vekâle murâdımızdır deyü ba‘de’d-da‘vâ ve’l-istintâk teberdâr-ı mezbûr cevâbında mezkûr Kabril zimmînin mütemekkin olduğu dükkân ve oda-i mezkûr fi’l-asl manav dükkânı olup derûnlarında mevcûd gedik ta‘bîr olunur manav âlâtı benim mülküm olmağla tabîb âlâtı dahi mülküm olmuş olmağla dükkân ve oda-i mezkûrları mutasarrıfları mezbûrûndan ben istîcâr ve gediklerinde ma‘an âhara îcâr ederim demesi meşrûh ve mu‘teber olmadığından mâ‘adâ dükkân-ı mezkûrlarda iddi‘â eylediği manav gediği âlâtı mevcûde olmayıp ve aklâmda dahî mukayyed mu‘teber gediklerden olmamağın mûcebiyle sâlifü’z-zikr iki bâb dükkân ve odaya ber-vech-i muharrer gedik olmak zu‘mıyla müdâhale etmemek üzre mezbûr Teberdâr Mustafa’ya şer‘an tenbîh olunduğu huzûr-ı âlîlerine i‘lâm olundu. Fî 19 min Receb sene 1202.