İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 139 Hüküm no: 128 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Habibe Kadın’a ait ekmek fırınının çalışmaması sebebiyle kiracıların kira anlaşmalarını fesh ettikleri Ma‘rûz İstanbul’da Hocapaşa kurbünde Hobyar mahallesinde sâkine sâhibe-i arzuhâl Saraylı Habîbe Kadın bt. Abdullah tarafından ber-vech-i âtî vekîl olduğu zâtını ârifân es-Seyyid Süleyman Efendi b. es-Seyyid Ali ve Bostânî Hüseyin b. Ebubekir şehâdetleriyle sâbit olan Ömer Ağa b. Hüseyin nâm kimesne meclis-i şer‘-i münîrde etmekçiler kethüdâsı ve nizam ustaları hâzır oldukları hâlde etmekçi tâ’ifesinden Mustafa Beşe b. Hüseyin ile şerîki derûn-ı arzuhâlde mastûrü’l-ism Fırayo v. Molyo nâm zimmî mahzarlarında mezbûrûn Mustafa ve Fırayo zimmî müvekkilem mezbûrenin İstanbul’da Hasanpaşa Hânı tahtında bi’l-icâreteyn mutasarrıfe olduğu bir bâb mu‘attal etmekçi fırınında beher şehr yirmişer guruş icâre tesmiyesiyle müste’cirleri olmağla işbu sene-i mübâreke Cemâziye’l-âhiresi şehriyesi olan yirmi guruşu ve ba‘de’l-yevm zimmetlerinde icâre müctemi‘ oldukça ezâ ve cefâ etmeksizin müvekkilem mezbûreye teslîm mezbûrâna tenbîh olunmak bi’l-vekâle matlûbumdur dedikde mezbûrân Mustafa Beşe ve Fırayo zimmî cevâblarında fırın-ı mezkûr birkaç seneden beru mu‘attal olup kendi değirmeni ve âhar değirmenden ta‘yînâtı olmamağla târîh-i i‘lâmdan bir ay mukaddem vekîl-i mezbûr ile fesh-i akd-i îcâr etmemizle icâreden zimmetimizde ancak yirmi guruş deynimiz bâkî kalmışdır deyip ve fırın-ı mezkûrun gediğinden rızâlarıyla keff-i yed ve ibrâ-yı zimmet ve fîmâ ba‘d fırın-ı mezkûrun gediğine ta‘arruz etmemek üzre âhar akâra tebdîle izn verdiklerinde vekîl-i mezbûr dahî râzı olduğu tescîl ve huzûr-ı âlîlerine i‘lâm olundu. Fî 25 min Recebi’l-ferd sene 1202.