İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 143 Hüküm no: 133 Orijinal metin no: [34a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara el-Hâc Hasan b. Abdullah ve ortağının İstanbul’a gizlice un getirip sattıkları Ma‘rûz Âsitâne-i aliyye’de habbâzân esnâfının kethüdâları İsmail Ağa ve uncular kethüdâsı Mustafa Ağa ve nizâm ustalarından Ahmed Ağa ve Bedir Ağa oğlu Molla Mustafa ve el-Hâc İsmail ve Mehmed Beşe ve Süleyman Beşe ve Eyüb Ağa ve es-Seyyid Süleyman ve es-Seyyid Ömer Ağa ve Hasan Ağa nâm [34b] kimesneler ile zimmîlerden Usta Vartan ve Usta Abram ve Usta Kazar ve Usta Bedros ve Serkiz ve Tokil ve Aleksan ve Karabet vesâ’irleri meclis-i şer‘-i enverde Kara el-Hâc Hasan b. Abdullah mahzarında mezbûr el-Hâc Hasan kendi hâlde olmayıp hilâf-ı fermân-ı âlî ve muğâyir-i nizâm-ı kadîm taşradan Âsitâne-i aliyye’ye vürûd eden dakîki hufyeten ashâbından iştirâ ve şerîkinin Tekfurdağı’ndan irsâl eylediği dakîki bir takrible kapandan ihrâc ve izâ‘at olunacak mahallere ve sefînelere ziyâde bahâ ile hufyeten bey‘ ve ol vecihle ihtikârı kendiye âdet ve zehâ’irin itlâfına bâ‘is ve nizâm-i kadîmimizin ihtilâline bâdî olmağla mezbûrdan bir vecihle emniyetimiz yokdur deyü teşekkî ve te’dîbini iltimâs eylediklerinde mezbûr el-Hâc Hasan fîmâ ba‘d kendi hâlinde olup hufyeten dakîk bey‘ ve şirâ etmeyip narh-ı cârîsi üzre sâ’ir uncuların bey‘ eyledikleri misillü lüzûmu olan mahallere bey‘a ve hilâf-ı fermân-ı âlî ve muğâyir-i nizâm hareket etmemek üzre ta‘ahhüd etmekle mezbûr el-Hâc Hasan’ın ahd-i mezkûrunda sebâtına kapan tüccârından el-Hâc Mehmed Emin Ağa ve el-Hâc Ömer Ağa ve Peksimetcibaşı es-Seyyid Mehmed Emin Ağa ve A‘yân el-Hâc Hüseyin nâm kimesneler tekeffül eylediklerinde esnâf-ı mezbûrûn dahî râzı oldukları İstanbul Mahkemesi’nden tescîl ve huzûr-ı âlîlerine i‘lâm olundu. Fî 25 B. sene 1202.