İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 145 Hüküm no: 135 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. el-Hâc Ömer’in kasap dükkanı gedik hissesi ve aletlerini Feyzullah Beşe’ye sattığı Ma‘rûz Evkâf-ı hümâyûn-ı hazret-i şehriyârîden Dokuzuncu Selhhâne’ye merbût olup medîne-i Üsküdar’da Vâlide Câmi‘-i Şerîfi Meyyitkapısı karşısında vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısf hissesine bâ-temessük-ı mütevellî mutasarrıf olan Süleyman b. el-Hâc Ömer nâm kimesne meclis-i şer‘-i enverde hâlâ Kasabbaşı Mehmed Emin Ağa tarafından vekîli kasablar kethüdâsı el-Hâc Ali Ağa ve ustalarından el-Hâc Osman ve İsmail Usta hâzır oldukları yine kasab ustalarından Feyzullah Beşe b. el-Hâc Ömer muvâcehesinde takrîr-i kelâm edip ber-vech-i muharrer mutasarrıf olduğum nısf âlât-ı lâzıme-i ma‘lûmemi hüsn-ı rızâ ve tayyib-i ihtiyârım ile bedel-i ma‘lûm ve makbûz mukâbelesinde mezbûr Feyzullah Beşe’ye bâ-re’y-i mütevellî ferâğ ve kasr-ı yed eylediğimde ol dahî tefevvüz ve kabûl edip fîmâ ba‘d nısf âlât-ı mezkûrede benim kat‘â alâka ve medhalim kalmayıp mezbûr Feyzullah Beşe’nin hakk-ı mufavvazı olmuşdur dedikde mezbûr Feyzullah Beşe dahî ba‘de’t-tasdîk nısf âlât-ı mezkûre mezbûr Süleyman’ın ferâğından merkûm Feyzullah Beşe üzerine tahrîr ve defter-i vakfa kayd birle yedine temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm [olundu]. Fî 2 Ş. sene 1202.