İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 145 Hüküm no: 136 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalfa Eskinaz ve ortağı Evadye’nin çuka ve Frenk şalı bahasından Fransız, Venedik ve Prusya tüccarlarına borçlu oldukları Ma‘rûz Mahrûse-i Galata’da ticâret vechi üzre meks ve ikâmet edip Âsitâne-i aliyye’de Bezâzistân civârında Acıçeşme nâm mahalde mütemekkin çukacı tâ’ifesinden derûn-ı arzuhâlde isimleri mastûr Kalfa Eskinazi v. Eskinazi ve şerîki Evadye v. Velvi nâm Yahûdîlerden ma‘lûmü’l-ecnâs çuka ve Frenk şalısı semenlerinden kırk bin guruş iddi‘a eden Françe tüccârından Mosipren v. Perne ve otuz beş bin guruş iddi‘â eden Prusya tüccârından Moso Arnes v. Arnes ve otuz dokuz bin guruş iddi‘â eden Nedirland’a tüccârından Vandersakrof v. Vandersakrof ve otuz iki bin guruş iddi‘â eden İngiltere tüccârından Tok v. Tok nâm müste’menler ile üç bin guruş iddi‘â eden Venedik tüccârından Fava v. Fava’dan beş bin guruş iddi‘â eden Sabetay v. Yoda ve dokuz bin guruş iddi‘â eden Nesim v. Mosi nâm Yahûdîler taraflarından ber-vech-i âtî vekîlleri olduğu Sabetay v. Aslan ve Mosi v. Avram nâm Yahûdîler şehâdetiyle sâbit olan Prusya Baştercümanı Aleksandır ve Pankli v. Aton Pankli meclis-i şer‘-i [35b] enverde mesfûrân Kalfa Eskinazi ve şerîki Evadye Yahûdîler mahzarlarında müvekkillerim mersûmûnun mesfûrân Kalfa Eskinazi ve Evadye Yahûdîler zimmetlerinde bundan akdem yedlerinden iştirâ ve kabz eyledikleri ma‘lûmü’l-ecnâs çuka ve Frenk şalısı semenlerinden bâlâda tafsîl olunduğu üzre cümlesinin cem‘an yüz yetmiş üç bin guruş alacak hakları olmağla bi’l-vekâle taleb ederim deyü da‘vâ eyledikde anlar dahî ber-vech-i muharrer müvekkilûn-ı mersûmûna cihet-i mezkûreden ol mikdâr deynleri olduğunu her biri ikrâr ve i‘tirâf etmeğin mûcebince meblağ-ı mecmû‘-ı mezkûr yüz yetmiş üç bin guruşu müvekkilûn-ı mersûmûn içün vekîl-i mersûma edâ ve teslîme mesfûrân Kalfa Eskinazi ve Evadye Yahûdîlere tenbîh olunduğu huzûr-ı âlîlerine i‘lâm olundu. Fî 29 min Receb sene 1202.