İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 146 Hüküm no: 137 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Kasımzâde es-Seyyid Abdülvehhâb Çelebi’nin devlete ve kapan tüccarlarına buğday bedelinden olan borcu sebebiyle sıkıştırılmaması ve borçlarını taksitler halinde ödemesi Ma‘rûz Âsitâne-i aliyye’de vâki‘ habbâzân esnâfının kethüdâları İsmail Ağa ve ustalarından Ahmed Ağa ve Eyüb Ağa ve es-Seyyid Süleyman Ağa ve es-Seyyid Ömer Ağa ve Bedirzâde Molla Mustafa ve Abdülkadir ve Mehmed Beşe ve Süleyman Beşe nâm kimesneler ile zimmîlerden Usta Nebos ve Usta Mığırdıç ve Usta Aleksan ve Usta Bogos ve Usta Abram ve Usta Agob nâm zimmîler vesâ’irleri meclis-i şer‘-i enverde her biri takrîr-i kelâm edip öteden berû hırfetimizden ashâb-ı fırın ve değirmenden cânib-i mîrîye ve kapan tüccârına mü’eccelen ve mukassıtan edâ eder iken siyâneten li’l-mîrî âhar dâyinleri alacaklarını tahsîl içün ol ustayı tazyîk ve ta‘cîz ve bu vecihle müdâhale ettirilmemek şurût-ı mer‘iyye ve yedimizde müte‘addid evâmir-i aliyyemiz olup hâlâ beynimizde düstûrü’l-amel iken etmekçi tâ’ifesinden Kapan-ı Dakîk dâhilinde fırın ve değirmen mutasarrıfı sâhib-i arzuhâl el-Hâc Kasımzâde es-Seyyid Abdülvehhâb Çelebi nâm kimesnenin hınta ve şa‘îr bahâlarından cânib-i mîrîye ve kapan tüccârına ma‘lûmü’l-mikdâr deyni olup ve deyn-i mezkûrını ber-mûceb-i şurût-ı fermân-ı âlîşân cânib-i mîrîye ve kapân tüccârına mü’eccelen ve mukassatan edâ eder iken dîvân-ı sâ’ire ashâbı medyûn-ı mezbûru mallar tahsîli içün tazyîk ve ta‘cîz ile mâl-ı mîrîye ve mâl-ı tüccâra zararı mü’eddî ve bu sûretde medyûn-ı mezbûrun firârı dahî emr-i mukarrerdir deyü her biri alâ tarîkı’ş-şehâde haber vermeleriyle mezbûr es-Seyyid Abdülvehhâb Çelebi cânib-i mîrîye ve kapân tüccârına olan deyni mü’eccelen ve mukassatan edâ oluncaya değin düyûn-ı sâ’ire ashâbı imhâl edip taraflarından malları tahsîli içün mezbûru tazyîk ve ta‘cîz ve müdâhale etmemek üzre emsâli misillü başmuhâsebeye kayd ve mezbûr es-Seyyid Abdülvehhâb Çelebi yedine tuğrâ-yı garrâ ile mu‘anven emr-i âlîşân sudûrunu istid‘â eyledikleri huzûr-ı âlîlerine i‘lâm olundu. Fî 4 min Şa‘bân sene 1202.