İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 147 Hüküm no: 138 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapancı Mühtedî İbrahim b. Abdullah’ın buğday bedelinden devlete ve kapan tüccarlarına olan borcunun tahsil edilmesi Ma‘rûz Âsitâne-i aliyye’de kapân tüccârından re’isler kethüdâsı Ahmed Ağa ve el-Hâc Ömer Ağa ve el-Hâc Mustafa Ağa taraflarından vekîl-i şer‘îleri A‘yân el-Hâc Hüseyin Ağa ve Zeytuncu es-Seyyid el-Hâc Ahmed Ağa ve Kırîmî el-Hâc İsmail Ağa ve Mehmed Yazıcı ve Sofîlerli Mustafa Yazıcı ve Ebubekir Ağa ve diğer Mustafa Yazıcı ve Kasab el-Hâc Mehmed ve es-Seyyid Abdullah Yazıcı ve Feyzullah Yazıcı ve es-Seyyid Mustafa Yazıcı ve Ahmed Yazıcı ve Abdülkadir Ağa nâm kimesneler habbâzân kethüdâsı İsmail Ağa ve nizâm ustalarından Ahmed Ağa ve Abdülkadir Ağa ve Küçük Ali Beşe nâm kimesneler hâzır oldukları hâlde meclis-i şer‘-i şerîf-i enverde Yedikule hâricinde vâki‘ bir bâb habbâz fırını ve ittisâlinde kâ’in altı horoslu değirmenin yirmi dört sehm i‘tibârıyla beyne’l-esnâf gedik ta‘bîr olunur on üç re’s bargir ve mârrü’z-zikr bargirlere iktizâ eden âlât-ı lâzıme-i ma‘lûmesine mutasarrıf olan Mühtedî İbrahim b. Abdullah muvâcehesinde her biri bi’l-asâle ve bi’l-vekâle takrîr-i kelâm edip Âsitâne-i aliyye ve bilâd-ı selâsede etmekçi ve uncu değirmenleri âlâtlarına Müslim ve zimmîden birkaç nefer kimesneler müştereken mutasarrıf olmalarıyla her bir dükkâna mutasarrıfları içlerinden birini kapancı ta‘yîn edip ol dahî külle yevm iskeleye nüzûl ve bizlere dahî nisbeten ma‘lûmü’l-keyl külliyetlü hınta iştirâ edip semenlerini bize edâ etmek mu‘tâd olmağla her bir değirmenin kapancısı tebdîl ve ihrâc olunmak iktizâ eyledikde şürekâ-i sâ’iresi kendi beyinlerinde hufyeten [iştirâ] etmeyip kethüdâ ve nizâm ustalarına ve tüccâra ba‘de’l-inhâ cümlenin re’yiyle şürekâlarından tüccârın makbûlü olan kapancı nasb ve ma‘zûlün yedinde mevcûdu ne mikdârdır ve zimmetinde tüccâra deyni ne mikdârdır kethüdâ ve ustaları ma‘rifetiyle hesâb olunup eğer mevcûdu deynine mukâbil ve mu‘âdil ise yerine nasb olunan kabûl ve edâya ta‘ahhüd edip eğer deyni mevcûdundan ezyed ve evfer ise şürekâsından mu‘temed olanlar deyn-i mezkûrîne tekeffül edip her kim hilâf-ı hareket eder ise muhkem te’dîb olunmak üzre nizâm-ı mezkûr düstûrü’l-amel tutulmak içün başmuhasebeye kayd ve yedimize tuğrâ-yı garrâ ile mu‘anven emr-i âlîşân i‘tâ olunmuşken mârrü’z-zikr fırın ve değirmenin i‘tibâr-ı mezkûr üzre on üç re’s bargiri mezbûr İbrahim’in ve on birer re’s bargiri gâ’ibân ani’l-meclis Kirkor zimmî ile Marvik Nasrâniye’nin tasarruflarında olmağla merkûm İbrahim Etmekçi’nin ticâretinde şerîki olan Mığırdıç zimmî kapancı iken târîh-i i‘lâmdan seksen beş gün mukaddem tebdîl ve ihrâc murâd ettikde kethüdâ ve nizâm ustaları ma‘rifetleriyle hesâbları rü’yet ve kendi kapancı nasb olundukda merkûm Mığırdıç zimmînin değirmen-i mezkûr içün iştirâ eylediği hınta semeninden cânib-i mîrîye ve bizlere deyni olan ma‘lûmü’l-mikdâr meblağdan mevcûdunu ba‘de’l-edâ bâkî kalan beş bin altı yüz yirmi beş guruş deynini kabûl etmişken târîh-i mezkûreden berû cânib-i mîrîye ve bizlere bir akçe teslîm etmemekle ber mûceb-i şurût nizâm-ı mer‘iyye meblağ-ı bâkî-i mezkûr beş bin altı yüz yirmi beş guruşu cânib-i mîrîye ve bizlere edâya mezbûr İbrahim’e tenbîh olunmak matlûbumuzdur deyü takrîrlerine mutâbık bin iki yüz bir senesi Cumâde’l-âhiresi’nin on beşinci günü târihiyle müverrah bir kıt‘a emr-i âlîşan ibrâz eylediklerinde kethüdâ-yı mezbûr ile nizâm ustaları mezbûrûn tüccâr-ı merkûmûnu tasdîk ve mezbûr İbrahim’in deyn-i mezkûr beş bin altı yüz yirmi beş guruşu kabûl ve edâya ta‘ahhüdünü muvâcehesinde haber vermeleriyle ber-mûceb-i emr-i âlîşân [36b] meblağ-ı bâkî-i mezkûr beş bin altı yüz yirmi beş guruşu cânib-i mîrî ve tüccâr-ı mezbûrûna merkûm İbrahim edâ etmek iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 9 Ş. sene 1202.