.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 119
Hüküm no: 124
Orijinal metin no: [19a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ali b. el-Hâc Bayram’ın vârislerinin evlerini el-Hâc Mustafa b. İbrahim’e sattıkları

Mahmiye-i İstanbul’da Timurtaş Mahallesi’nde sâkin iken bundan akdem müteveffâ olan Ali b. el-Hâc Bayram nâm kimesnenin verâseti zevce-i metrûkesi Alime bt. Hüseyin nâm hatun ile sulbî oğulları Hüseyin ve Süleyman ve Ahmed nâm kimesnelere münhasıra olup kable’l-kısmet mezbûr Ahmed dahi müteveffâ olup verâseti vâlidesi merkūme Alime ile li-ebeveyn karındaşları olan mersûmân Hüseyin ve Süleyman’a münhasıra olup bi-tarîkı’l-münâsaha tashîh-i mes’eleleri iki yüz seksen sekiz sehmden olup elli sehmi mezbûre Alime’ye ve yüz on dokuz sehmi mezbûr Hüseyin’e ve yüz on dokuz sehmi dahi merkūm Süleyman’a isâbet eylediği sâbit ve müte‘ayyen oldukdan sonra mezbûrûn Hüseyin ve Süleyman ve Alime mahfil-i şer‘-i şerîfde işbu sâhibü’l-kitâb el-Hâc Mustafa b. İbrahim nâm bostanî mahzarında herbiri ikrâr u i‘tirâf edip mahalle-i mezbûrede vâki‘ bir tarafdan Hüseyin Çavuş mülkü ve bir tarafdan Mehmed Çelebi mülkü ve bir tarafdan el-Hâc Nasuh mülkü ve bir tarafdan tarîk-i âm ile mahdûd mülk-i mevrûsumuz olup arsasının Timurtaş Vakfı’na senede yüz altmış akçe mukāta‘ası ve iki bâb fevkānî beyti ve bir mahzen ve kenîf ve bi’r-i mâyı ve icâre-i mu‘accele ve yevmî iki akçe ücret-i müeccele ile bir bâb mahzeni dahi hâvî olan mülk menzili cümle tevâbi‘i ve levâhıkı ile mezbûr el-Hâc Mustafa’ya iki bin beş yüz riyâlî guruşa bey‘ ve teslîm ol dahi iştirâ ve tesellüm edip semen-i mersûm iki bin beş yüz guruşu yedinden ahz u kabz edip alâ-mâ farazallâhu te‘âlâ herbirimiz hisse-i şer‘iyyemizi beynimizde taksîm istîfâ eyledik, ba‘de’l-yevm menzil-i mezbûrda kat‘an alâkamız kalmayıp mezbûr el-Hâc Mustafa’nın mülk-i mahzı olmuşdur, hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb sebt ü ketb olundu.

Fî-evâili Zilka‘deti’ş-şerîfe li-sene selâse ve sittin ve elf.

Şuhûdü’l-hâl: el-Hâc Mustafa b. Hasan, Mehmed Çelebi b. el-Hâc Mustafa, el-Hâc Hasan b. Abdullah, el-Hâc Mustafa b. Ömer, el-Hâc Osman b. Abdullah ve gayruhum mine’l-huzzâr.