İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 153 Hüküm no: 148 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasabbaşı Hânı’ndaki mahzen ve dükkanın sahipleri tarafından el-Hâc Hüseyin ve el-Hâc Mehmed Emin’e kiraya verildiği Ma‘rûz Sâhib-i arzuhâl Osman Ağa b. Halil kendi nefsinden asâleten ve Amine Hânım bt. Hüseyin Paşa tarafından vekîl olduğu zât-ı mûmâileyhâyı ârifân Feyzullah Efendi b. Abdullah ve Hasan Efendi b. Veliyyüddin şehâdetleriyle sâbit olmağla vekâleten ve Lebibe Hânım bt. Ragıb Mehmed Paşa tarafından vekîl olduğu kezâlik zât-ı mûmâileyhâyı ârifân şâhidân-ı mezbûrân şehâdetleriyle sâbit olan İsmail Efendi b. İbrahim vekâleten ve Aron v. Aslan nâm Yahûdî ile Agob v. Avanes nâm zimmî asâleten meclis-i şer‘-i enverde derûn-ı arzuhâlde isimleri mezkûr el-Hâc Hüseyin b. Osman ve el-Hâc Mehmed Emin b. el-Hâc Mehmed nâm kimesneler mahzarlarında İstanbul’da Alaca Hamâm kurbünde Kasabbaşı Hânı dimekle ma‘rûf bizim ve müvekkiletân-ı mûmâileyhimânın iştirâken bi’l-icâreteyn taht-ı tasarrufumuzda olan hân tahtında kâ’in bir bâb mahzende mezbûr el-Hâc Hüseyin müste’cir olmağla bu esnâda mahzen-i mezkûrdan mezbûr el-Hâc Hüseyin ihrâca tasaddî etmişidik lâkin beynimize muslihûn tavassut edip mahzen-i mezkûru târîh-i i‘lâmdan beher mâh doksanar pâre icâre tesmiyesiyle yine mezbûr el-Hâc Hüseyin’e bi’l-asâle ve bi’l-vekâle îcâr eylediğimizde ol dahî ba‘de’l-istîcâr ve’l-kabûl mezbûr el-Hâc Mehmed Emin dahî mahzen-i mezkûr ittisâlinde kâ’in bir bâb mahzende müşâhereten müste’cirimiz olup mezbûr ile bi’l-asâle ve bi’l-vekâle fesh-i akd-i îcâr etmemizle târîh-i i‘lâm şehrî gâyetinde mahzen-i mezkûru tahliye ve bize teslîme ta‘ahhüd ettikden sonra hân-ı mezkûr hâricinde yine iştirâken tasarrufumuzda olup beher mâh üçer buçuk guruş icâre tesmiyesiyle müste’cirimiz olduğu tahtı bodrumlu bir bâb leblebici dükkânı zahrında vâki‘ bir bâb mahzenimizi dahî tarîh-i i‘lâmdan beher mâh doksanar pâre icâre tesmiyesiyle mezbûr el-Hâc Mehmed Emin’e bi’l-asâle ve bi’l-vekâle îcâr ve teslîm eylediğimizde mezbûr el-Hâc Mehmed Emin dahî ber-vech-i muharrer îstîcâr ve’l-kabûl eyledi dediklerinde mezbûrân el-Hâc Hüseyin ve el-Hâc Mehmed Emin’den her biri makrûn-ı mezbûrûnu [39a] tasdîk eyledikleri tescîl ve huzûr-ı âlîlerine i‘lâm olundu. Fî 13 min Şa‘bân sene 1202.