İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 154 Hüküm no: 149 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko v. Nikola ve Yano v. Kosta’nın kasap dükkanı gedik hisse ve aletlerini Kolo v. Lazari’ye sattıkları Ma‘rûz Evkâf-ı hümâyûn-ı hazret-i şehriyârîden Birinci Selhâne’ye merbû[t] olup mahrûse-i Galata’da Kürkçükapısı hâricinde aşcı dükkânı ittisâlinde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmeye iştirâken mutasarrıflar olan Liko v. Nikola ve Yano v. Kosta nâmıyla meclis-i şer‘-i enverde hâlâ Kasabbaşı Mehmed Emin Ağa tarafından vekîli kassâbân kethüdâsı el-Hâc Ali Ağa ve ustalarından el-Hâc Osman Ağa ve Mehmed Said Ağa ve Mehmed Emin Ağa ve Abdullah Ağa hâzır oldukları hâlde kasab ustalarından Kolo v. Lazari nâm zimmî muvâcehesinde her biri takrîr-i kelâm edip ber-vech-i muharrer iştirâken mutasarrıf olduğumuz âlât-ı lâzıme-i ma‘lûmemizi hüsn-ı rızâ ve tayyib-i ihtiyârımız ile bedel-i ma‘lûme ve makbûz mukâbelesinde bâ-re’y-i mütevellî mersûm Kolo zimmîye ferâğ ve tefvîz eylediğimizde ol dahî tefevvüz ve kabûl idüb fîmâ ba‘d âlât-ı mezkûrede bizim kat‘â alâka ve medhalimiz kalmayıp mersûm Kolo zimmînin hakk-ı mufavvazı olmuşdur dedikde mersûm Kolo zimmî dahî ba‘de’t-tasdîk hâzırûn-ı mezbûrûn mersûm Kolo zimmî kasab ustalarından olduğunu haber vermeleriyle âlât-ı mezkûre merkûmân Liko ve Yano ferâğlarından mersûm Kolo zimmî üzerine tahrîr ve defter-i vakfa kayd birle yedine temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî 16 min Şa‘bân sene 1202.