İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 154 Hüküm no: 150 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âişe bt. İsmail’e ölen oğlundan kalan vakıf fırın ve değirmeni tasarruf etmesi için mütevelli tarafından izin verildiği Ma‘rûz İstanbul’da Sofiler mahallesinde vâki‘ merhûm eş-Şeyh Süleyman Efendi Zâviyesi Vakf-ı mütevellîsi sâhib-i arzuhâl el-Hâc Mustafa Efendi meclis-i şer‘-i enverde derûn-ı arzuhâlde mezkûretü’l-ism ma‘rifetü’z-zât Âişe bt. İsmail mahzarında vakf-ı mezbûr müsakkafâtından mahalle-i mezbûrede kâ’in habbâz fırını ile ittisâlinde dört horoslu bir bâb değirmene bi’l-icâreteyn mutasrrıf olan Mehmed Raşid Efendi târîh-i i‘lâmdan kırk gün mukaddem maraz-ı mevtinde mârrü’z-zikr fırın ve değirmeni hüsn-ı rızâsıyla vâlidesi mezbûre Âişe Hatun’a fâriğ oldukda ben dahî zikr olunan fırın ve değirmende mezbûre Âişe Hatun’un tasarrufuna izin ve temessükünü temhîr etmişidim lâkin mezbûr Mehmed Raşid Efendi otuz beş gün mürûrunda fevt olmağla ferâğ-ı mezkûr maraz-ı mevtinde olduğuna binâ’en sahîh ve mu‘teber olmayıp fırın ve değirmen-i mezkûr mahlûl ve cânib-i vakfa â’id ve râci‘ olmuşiken mezbûre Âişe Hatun âhara îcârıma mumâna‘at etmekle men‘ ve ref‘ olunmak bi’t-tevliye matlûbumdur deyü da‘vâ eyledikde mezbûre Âişe Hatun dahî cevâbında oğlum müteveffâ-yı mezbûr yirmi beş seneden beru maraz-ı müzmine mübtelâ olmağla târîh-i i‘lâmdan kırk gün mukaddem fırın ve değirmen-i mezkûru huzûr-ı mütevellîde hüsn-ı rızâsıyla bana fâriğ ve otuz beş gün mürûrundan sonra marazı müşted ve hâli mütegayyir olup fevt olmuşdur dedikde mütevellî-i mezbûr dahî merkûm Mehmed Raşid Efendi’nin hîn-i ferağı altı ay mukaddem olan hâlî üzere olduğunu mukır ve mu‘terif olup ol vecihle müteveffâ-yı mezbûrun hîn-i ferâğı [39b] maraz-ı mevt ad olunmamağla beyinlerine muslihûn tavassut edip mezbûre Âişe Hatun teberru‘an li’l-vakf mütevellî-i mezbûre mâlından iki yüz guruş def‘ ve teslîm ve umûr-ı vakfa harc u sarf etmek üzere emr eyledikde ol dahî ahz u kabz ve defter-i muhâsebeye idhâle ta‘ahhüd ve zikr olunan fırın ve değirmende mezbûre Âişe Hatun’un tasarrufuna ke’l-evvel izin verdikde mezbûre Âişe Hatun dahî medfû‘ı olan meblağ-ı mezkûr iki yüz guruşdan cânib-i vakf ve mütevellî-i mezbûrun zimmetini ibrâ ve iskât etmekle ol dahî ibrâ-i mezkûru kabûl ve bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî 16 min Şa‘bâni’l-mu‘azzam sene 1202.