İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 155 Hüküm no: 151 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalfa Eskanazi ve Avadye adlı tacirlerin iflaslarına hükm olunduğu Ma‘rûz Bâlâda mastûr derkenâr nâtık olduğu üzre mahrûse-i Galata’da ticâret vechi üzere meks ve ikâmet eden França tüccârından Mosi Prens v. Prens nâm müste’mene ma‘lûmü’l-ecnâs çuka ve Frenk şalısı semenlerinden kırk bin guruş ve Bursa tüccârından Mosi Garnes v. Arnes nâm müste’mene otuz beş bin guruş ve Nedrlanda tüccârından Vandersakarof v. Andersakarof nâm müste’mene otuz dokuz bin guruş ve İngiltere tüccârından Tok v. Toek nâm müste’mene otuz iki bin guruş ve Venedik tüccârından Fava v. Fava nâm yahûdîye üç bin guruş ve Sabetay v. Yoda nâm Yahûdî’ye on beş bin guruş ve Nesim v. Mosi nâm Yahûdî’ye dokuz bin guruş ki cem‘an bir yük yetmiş üç bin guruş deynleri içün müddet-i vâfireden beru Galata voyvodası habsinde mahbûs olan Âsitâne-i aliyye’de Bezâzistân civârında Acıçeşme nâm mahalde mütemekkin çukacı tâ’ifesinden sâhib-i arzuhâl Kalfa Eskanazi v. Eskanazi ve şerîki Avadye v. Levi nâm Yahûdîler meclis-i şer‘-i enverde dâyinleri bâlâda isimleri mezkûr dört nefer müste’men ve üç nefer Yahûdîler taraflarından vekîlleri olduğu Sabetay v. Aslan ve Mosi v. Avram nâm Yahûdîler şehâdetleriyle sâbit olan Prusya Baştercümânı Aleksandro Pankli v. Andon Pankli ile mahbûsen terâfu‘larında bizim müvekkilûn-ı mersûmûna zimmetimizde deynimiz olan cem‘an bir yük yetmiş üç bin guruşun altı bin dört yüz doksan yedi guruş doksan akçesi mukâbelesinde mârrü’z-zikr dükkân ve odamızda mevcûd malımız olan ma‘lûmü’l-ecnâs çuka ve Frenk şalısı teslîm eylediğimizde vekîl-i mezbûr dahî bi’l-vekâle ahz u kabz eyledikden sonra bizim bundan akdem yedimizden iştirâ ve kabz eyledikleri çuka semeninden gâ’ibûn ani’l-meclis Kavukçu İbrahim nâm kimesne zimmetinde dört yüz on beş guruş ve Kavukçu es-Seyyid Mustafa zimmetinde iki yüz yirmi guruş ve Kavukçu Mehmed Emin Ağa zimmetinde dahî dört yüz otuz guruş ve hâlâ Gümrükcü Süleyman Ağa zimmetinde dahî iki bin seksen guruş ve Nimtenci Metro zimmetinde bin iki yüz kırk [40a] guruş ve hâlâ Asesbaşı Çorbacı Arif Ağa zimmetinde dört yüz kırk guruş ve hâlâ ocak bâzirgânı Çelbon Yorosalim Yahûdî zimmetinde bâ-temessük bir yük elli iki bin dokuz yüz on beş guruş ki cem‘an bir yük elli yedi bin dört yüz kırk guruş alacak hakkımız olmağla meblağ-ı mecmû‘-ı mezkûru her birinden taleb ve da‘vâ ve ahz u kabz ve deynimiz içün müvekkilûn-ı mersûmûna edâya her birimiz tarafımızdan tercümân-ı mersûm Aleksandro Pankli’yi vekîl eylediğimizde ol dahî ber-vech-i muharrer vekâlet-i mezkûreyi kabûl edip bâkî sekiz bin yedi yüz altmış iki guruş deynimiz kalıp lâkin biz fakîrü’l-hâl ve müflis ve mu‘dim ve ma‘sir olup edâ-yı deyne iktidârımız ve üzerimizde lâbis olduğumuz köhne libâsımızdan gayrı ism-i mâl ıtlâk olunur kat‘â bir nesnemiz olmamağla habsden sebîlimiz tahliye olunmak matlûbumuzdur deyü asârlarını iddi‘â eylediklerinde tercümân-ı vekîl-i mersûm dahî Yahûdiyân-ı mesfûrân ganî ve mu‘sir ve edâ-yı deyne kādirlerdir deyip yesârlarını iddi‘â eyledikde yesâr-ı beyyinesi asâr-ı beyyinesinden evlâ olduğuna binâ’en tercümân-ı vekîl-i mezbûr ber-vech-i muharrer Yahûdîyân-ı mersûmânın edâ-yı deyne iktidârları olduğunu isbâtdan izhâr-ı acz etmekle mesfûrân Kalfa Eskanazi ve Avadye Yahûdîler müflis ve mu‘dim ve mu‘sir olup edâ-yı deyne iktidârları ve üzerlerinde lâbis oldukları köhne libâslarından gayrı ism-i mâl ıtlâk olunur kat‘â bir nesneleri olmadığını İsak v. Mosi ve Avram v. Mosi ve Mihayil v. Salamon ve diğer İsak v. Avram ve âhar İsak v. Yoda nâm Yahûdîler şehâdetleri vekîl-i tercümân-ı mersûmûn muvâcehesinde vech-i şer‘î üzre isbât etmeğin mûcebince mesfûrân Kalfa Eskanazi ve Avadye Yahûdîlerin iflâslarına ba‘de’l-hükm sebîlleri tahliye olunmak iktizâ eylediği huzûr-ı âlîlerine i‘lâm olundu. Fî 19 min Ş. sene 1202.