İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 161 Hüküm no: 157 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mağribî el-Hâc Ahmed’in alacak davasını ispat edemediği için davanın reddolunduğu Ma‘rûz Arzuhâl eden Mağribî el-Hâc Ahmed b. Mehmed meclis-i şer‘-i şerîf-i enverde bâ-işâret-i aliyye sâdır olan emr-i âlîlerine imtisâlen ihzâr olunan sâbıkan İzmir kadısı kal‘a halîfesizâde Hamdullah Efendi’nin kethüdâsı Mehmed Hilmi Efendi b. İbrahim ile terâfu‘larında medîne-i İzmir’de ma‘lûmü’l-ism kimesne zimmetinde karzdan hakkım olan iki yüz otuz üç guruş mûmâileyh Hamdullah Efendi’nin zamân-ı hükûmetinde ben vech-i şer‘î üzere ba‘de’l-isbât ve’l-hükm meblağ-ı mezkûrdan iki yüz guruş on iki pâresini bana teslîm edip bâkî otuz iki buçuk guruş sekiz pâreyi kethüdâ olmak takrîbi merkûm Mehmed Hilmi Efendi ahz edip bana vermemeğin taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını beyâna kādir olmayıp ve tahlîfe dahî tâlib olmamağın mezbûr el-Hâc Ahmed da‘vâ-yı mezkûresiyle bilâ beyyine merkûm Mehmed Hilmi Efendi’ye mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 26 min Şa‘bân sene 1202.