İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 161 Hüküm no: 158 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hristo v. Yani ile ortakları Yenaki v. Dimo ile Yorgi v. Yani’nin bakkal dükkanı işletmesi hakkındaki anlaşmazlığın hisseler oranında sulh yoluyla giderildiği İstanbul’da Samatya dâhilinde vâki‘ Kurd Ağa Dükkânı dimekle ma‘rûf bir bâb bakkâl dükkânı derûnunda mevcûde beyne’l-hıref gedik ta‘bîr olunur âlât-ı lâzımenin yüz yirmi sehm i‘tibârıyla altmış üç buçuk sehmine mutasarrıf hâmil-i arzuhâl Hristo v. Yani nâm zimmî meclis-i şer‘-i şerîf-i enverde âlât-ı mezkûrenin ber i‘tibâr-ı mezkûr elli altı buçuk sehmine mutasarrıf ve hâlâ vaz‘-ı yedi mütehakkık olan Yenaki v. Dimo nâm zimmî ile terâfu‘larında zikr olunan âlât-ı lâzımenin altmış üç buçuk sehmine mukaddemâ benimle müşterek olan Yorgi v. Yani nâm zimmî ve ben ve mersûm Yenaki bin yüz doksan altı senesi Cumâde’l-âhiresi’nin on birinci günü mühâyâten evvelâ mersûm Yorgi sâniyen ben sâlisen mersûm Yenaki tasarruf etmek üzre bi’t-terâzî mu‘âhede ve âlât-ı lâzımenin cümlesini mersûm Yorgi zimmîye teslîm ol dahî bir sene zabt edip hissesini bana bey‘ etmekle dükkân-ı mezkûrdan hürûc ve âlât-ı mezkûreyi bana teslîm ben dahî iki sene zabt [42b] edip bin yüz doksan dokuz senesi rûz-ı Hızırı’nda mersûm Yenaki’ye teslîm edip mersûm Yenaki’nin elli altı buçuk sehmine benden ekall zabt etmek iktizâ eder iken târîh-i i‘lâma gelince üç sene iki buçuk ay tasarruf etmişken kanâ‘at etmeyip âlât-ı mezkûreyi bana teslîmden imtinâ‘ eder deyip mersûm Yenaki dahi âlât-ı mezkûreyi mersûm Yorgi ve Hristo dört sene zabt edip bana bin iki yüz senesi rûz-ı Hızırı’nda teslîm etmekle benden tasarrufum tamâm oldu deyip beyinlerinde münâza‘ât-ı kesîre vâkı‘a olmuşiken muslihûn tavassut edip bin iki yüz üç senesi Zilka‘desi’nin on beşinci gününe değin on dört buçuk ay dahî âlât-ı mezkûreyi mersûm Yenaki tasarruf edip müddet-i mezbûre tamâmında dükkân-ı mezkûrdan hurûc ve mersûm Hristo zimmîye teslîm ve min ba‘d beyinlerinde nizâ‘ olmamak içün âlât-ı mezkûreyi altmış üç buçuk ay mersûm Hristo ve elli altı buçuk ay mesfûr Yenaki mühâyâten zabt etmek üzre tanzîm ve beyinlerin tevfîk eylediklerinde anlar dahî râzı ve bu vecihle kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fi’l-yevmi’r-râbi‘ ve’l-ışrîn min Şa‘bân sene 1202.