İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 162 Hüküm no: 159 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar esnafının sattığı mallara, enfiyeci ve tüccarların karışmasının önlenmesi ve bu malları satmalarına izin verilmemesi Ma‘rûz Vâlide Sultân -tâbe serâhâ- hazretlerinin mahmiyye-i İstanbul’da vâki‘ câmi‘-i şerîfi evkâfından Sûk-ı Cedîd’de kâ’in attârân esnâfından ashâb-ı arzuhâl kethüdâ vekîli es-Seyyid Süleyman Ağa ve Kethüdâzâde el-Hâc Süleyman Ağa ve el-Hâc Yusuf Ağa ve es-Seyyid Hüseyin Ağa ve el-Hâc Halil Ağa ve es-Seyyid Hafız Mustafa Efendi ve el-Hâc Hasan Ağa ve diğer el-Hâc Süleyman Ağa ve diğer el-Hâc Hasan Ağa ve es-Seyyid el-Hâc İbrahim Ağa ve diğer el-Hâc Hüseyin Ağa ve es-Seyyid el-Hâc İbrahim Ağa ve diğer el-Hâc Hüseyin Ağa ve es-Seyyid el-Hâc Ahmed Efendi ve es-Seyyid Mehmed Said Ağa vesâ’ir müsin ve ihtiyâr ma‘lûmü’l-esâmî kimesneler meclis-i şer‘-i şerif-i enverde mahmiyye-i mezbûre hısnı ebvâbından Fenarkapısı karşısında bir bâb enfiyeci dükkânının müste’ciri Panayot v. Kiryako ve kurbünde vâki‘ âhar bir bâb enfiyeci dükkanının müste’ciri Kostantin v. Yorgi nâm zimmînin şerîki diğer Kostantin v. Peri ve Bahçekapısı kurbünde Yeni Câmi‘-i Şerîf imâreti tahtında vâki‘ bir bâb enfiyeci dükkânın müste’ciri Mihal v. Yorgaki nâm zimmîler ile terâfu‘larında işbu arzuhâl hâmişinde muharrer derkenâr ve yedimizde olup bâlâsı hatt-ı hümâyûn-ı şevket-makrûnla müveşşah ve mu‘anven emr-i âlî mantûklarınca Mısr-ı Kâhire Frenk câniblerinden Âsitâne-i aliyye vürûd eden cebek kahve ve kalay ve envâ‘-ı bahârâtı müstakillen biz ve frenk cânibinden vürûd eden şekeri biz ve şerbetci ve akîdeci esnâfı kethüdâ ve yiğitbaşı ve birkaç nefer müsin ve ihtiyâr kimesneler getüren tüccârdan bi’t-terâzî ma‘an iştirâ ve kahve ve kalay ve bahârâtı biz esnâfımıza taksîm ve şekeri dahî altı sehm i‘tibârıyla üç buçuk sehmini dükkânlarımızda ibâdullâha bey‘ içün esnâfımıza ve iki buçuk sehmi dahî envâ‘-ı eşribe ve reçel ve akîde tabhı içün şekerci ve akîdeci esnâfına taksîm edip tüccârdan eşyâ-i mezkûreyi iştirâ ve mübâya‘a husûsunda âharın müdâhalesi memnû‘ ancak bize mahsûs ve mahsûr olup ve enfiye ve yemenî ve kutu ve (...?) ve billur ve avîze ve bunun emsâlini dahî enfiyeci tâ’ifesi dükkânlarında mübâya‘a edip bizim metâ‘ımıza müdâhale îcâb etmez iken kana‘at etmeyip tüccârdan hilâf-ı emr-i âlî ve muğâyir-i hatt-ı hümâyûn şeker ve tiryak ve envâ‘-ı bahârât iştirâ ve dükkânlarında bey‘ etmeleriyle ber-mûceb-i emr-i âlî men‘ olunmaları murâdımızdır deyü eyledikleri bi’l-cümle takrîr-i meşrûhları vakı‘a mutâbık olduğunu mersûmûndan her biri müte‘âkiben ikrâr ve i‘tirâf ve ber-mûceb-i emr-i âlî fîmâ ba‘d tüccârdan şeker ve tiryak ve envâ‘-ı bahâr iştirâ etmeyip ve yedlerinde mevcûd şeker ve tiryakı râyici üzre esnâf-ı mezbûra bey‘ ve teslîme ta‘ahhüd etmeleriyle esnâf-ı mezbûra husûs-ı mezkûru mü’ekked yedlerine bir kıt‘a emr-i âlî inâyet ve ihsân buyurulmak istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 28 min Şa‘bân sene 1202.