İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 164 Hüküm no: 161 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hürmüz v. Evakim’in borcundan dolayı Papa Bogos’a verdiği vakıf menzil davasında belli bir ücret karşılığı anlaştığı Ma‘rûz Mübârek rikâb-ı müstetâba arzuhâl takdîm eden Hürmüz v. Evakim nâm zimmî meclis-i şer‘-i enverde zikr-i âtî vakf menzilin sâbık mutasarrıfı Papa Bogos v. Karabet ve vakf-ı mezkûr mütevellîsi Toma v. Artin nâm zimmî hâzır oldukları hâlde menzil-i mezkûra hâlâ bi’l-icâreteyn mutasarrıf olan Ananiye v. Pergam muvâcehesinde târîh-i i‘lâmdan on iki sene mukaddem mersûm Papa Bogos zimmî yedinden ve mâlından iktirâz ve kabz eylediğim iki yüz yirmi guruş ile kezâlik yedinden ve mâlından nesne iştirâ ve kabz eylediğim elvân yemeni semeninden seksen guruş ve bir sarı yakut yüzük taşı semeninden yüz guruş ki cem‘an karz ve semen-i eşyâdan zimmetimde deynim olan dört yüz guruş mukâbelesinde işbu mersûm Toma zimmînin mütevellîsi olduğu Sulu Manastır Kilisesi avârızı vakfı musakkafâtından olup kilisa-yı mezkûr kurbünde vâki‘ bi’l-icâreteyn tasarrufumda olan ma‘lûmü’l-hudûd ve’l-müştemilât bir bâb vakf menzilimi bâ-re’y-i mütevellî vefâ’en mersûm Papa Bogos’a ferâğ ve tefvîz ol dahî tefevvüz ve kabûl eyledikden sonra deyn-i mezkûrumdan beher şehr dörder guruşdan beş senede iki yüz kırk guruşu mersûma edâ bâkî yüz altmış guruşu dahî edâ ile menzi-i mezbûru fek ve bana red ve ferâğ lâzım iken mersûm Papa Bogos menzil-i mezkûru bâ-re’y-i mütevellî işbu mersûm Ananiye zimmîye ferâğ ve tefvîz ol dahî tefevvüz ve kabûl etmeğin hâlâ bâkî deynim olan yüz altmış guruşu edâ ile menzil-i mezkûru fek ve bana red ve ferâğ murâdımdır deyü ba‘de’d-da‘vâ ve’l-istintâk mersûm Ananiye zimmî cevâbında menzil-i mezkûr fi’l-hakîka müdde‘î-i mersûmun bi’l-icâreteyn tasarrufunda iken beş yüz on beş guruş bedel-i makbûz mukâbelesinde târîh-i mezbûrda bâ-re’y-i mütevellî kat‘â mersûm Papa Bogos’a ferâğ ve tefvîz ol dahî ba‘de’t-tefevvüz ve’l-kabûl bedel-i ma‘lûm ve makbûz mukâbelesinde bâ-re’y-i mütevellî bana ferâğ ve tefvîz edip hattâ bin yüz doksan dokuz senesi Zilka‘desi’nin yirmi ikinci günü menzil-i mezkûru mersûm Papa Bogos zimmîye bâ-re’y-i mütevellî kat‘iyyen ferâğ ve tefvîz eylediğini mersûm Hürmüz İstanbul kadısı şerâfetlü es-Seyyid Mehmed Derviş Efendi huzûrunda bi-tav‘ihî ikrâr ve i‘tirâf etmişdir deyü bi’l-cümle takrîr-i meşrûhuna mutâbık mersûm Ananiye zimmî ibrâz eylediği bir kıt‘a i‘lâm-ı şer‘înin mazmûnunu ba‘de’l-inkâr isbât üzre iken beyinlerine muslihûn tavassut edip mersûmân Bogos ve Ananiye müdde‘î-i mersûm Hürmüz zimmîye yirmi beş guruş verip ol dahî ba‘de’l-kabûl mazmûn-ı i‘lâm-ı mezkûru vicâhen ve şifâhen kat‘iyyen ikrâr ve i‘tirâf edip ve ba‘de’l-yevm menzil-i mezkûra ve târîh-i kitâba gelince cemî‘ hukûk-ı şer‘iyye müte‘allika âmme-i da‘âdan mersûmân Bogos ve Ananiye zimmîden her birinin zimmetlerini ibrâ ve iskāt eylediğinde anlar dahî medfû‘ları olan yirmi beş guruş mutâlebesine müte‘âllika da‘vâdan mersûm Hürmüz zimmînin zimmetini ibrâ’ ve iskāt ve her biri âharın ibrâsını kabûl ve külliyen kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fi 7 min N. sene 1202.