İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 165 Hüküm no: 162 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü esnafının Karadeniz sahilindeki altı ocaktan odun kesip kömür yapılıp İstanbul’daki esnafa dağıtmaları ve fazladan ocak ihdas edilmesinin yasaklanması Ma‘rûz Âsitâne-i aliyye’de ve bilâd-ı selâse sekenesinin eyyâm-ı şitâda muhtâc oldukları kömür Karadeniz sevâhilinde vâki‘ cibâlde hark olunup bu esnâda mahall-i mezkûreden Âsitâne’ye müstevfî kömür nakli müte‘assir olmağla refâh-ı hâl-i ibâd içün Gemlik ve Yalakâbâd ve Çınarcık ve Kocaderesi nâm mahallerde vâki‘ cibâl-i mübâha ta‘bîr olunur dokuz kıt‘a cebelden hatab kat‘ ve kömür hark ve Âsitâne’ye vakt u zamânıyla nakl ve mahzenlerine vaz‘ [44a] olunmak bâbında kömürcü esnâfı yedlerine emr-i âlî i‘tâ buyurulmak ricâsıyla bâ-arzuhâl eyledikleri istid‘âlarına binâ’en sâdır olan emr-i âlîlerine imtisâlen yedlerinde olan hâmiş-i arzda muharrer derkenâra nazar olunup cibâl-i mübâha-i mezkûreden kömür harkına dâ’ir kayd olmadığından mâ‘adâ hamâmcı esnâfı yedlerinde olan bin iki yüz iki senesi Cumâdelâhiresi’nde sâdır olan âhar bir kıt‘a emr-i şerîf dahî kayıkhâne-i hâssa ve Tersâne-i âmireye ber-vech-i ocaklık senevî üç bin kürek vermek üzre meşrût cebel-i mahsûsaya duhûl ve kat‘an odun kat‘ olunmayıp korucusu muhâfaza eyleye ve cibâl-i mübâha-i mezkûreden altı ocak i‘tibârıyla mazbûtü’l-esâmî altı nefer kimesne tomruk ve hatab kat‘ ve Âsitâne’ye nakl ve hamâmcı ve habbâzân ve çörekci vesâ’ir ibâdullâha bey‘ olunup ziyâde ocak ihdâs olunmaya deyü tasrîh ve kömür harkına dâ’ir kayd olmayıp ve hamâmcı esnâfı dahî husûs-ı mezkûre muhâlefet edip lâkin esnâf-ı sâ’ire re’isler kethüdâsı ve husûs-ı mezkûra vâkıf mevsûkü’l-kelim kimesneler tevsî‘-i mâl zımnında cibâl-i mezkûreden kömür harkını istihsân eylediklerinden mâ‘adâ kömürcü esnâfı ve kethüdâsı eşcâr-ı cibâl-i mezkûra halel ve kılel-târî olmayıp ve ziyâde ocak ihdâs etmeyeceklerine ta‘ahhüd etmeleriyle fi’l-hakîka sekene-i İstanbul ve bilâd-ı selâseye eyyâm-ı şitâda kömür husûsunda vüs‘at husûlü müyesser olduğu takdîrce cibâl-i mezkûre ziyâde ocak ihdâs olunmayıp ancak altı kıt‘a ocak olduğu hâlde kat‘ olunan tomruk ve hatab Âsitâne’ye müstevfî nakl olandan fazlası Karadeniz sevâhilinde fırsat-yâb oluncaya değin kömür hark ve Âsitâne’ye nakl içün müsâ‘ade-i aliyye buyurulmak re’y-i rü’yet-i âlîlerine manûtdur. Fî 2 N. sene 1202.