İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 166 Hüküm no: 163 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavraki v. Nikola’nın, Çoban İstoyo’dan teleme peyniri satışı sebebiyle açtığı davada haksız olduğu Ma‘rûz Sâdır olan fermân-ı âlîlerine imtisâlen İstavraki v. Nikola nâm zimmî evvelen Dîvân-ı âlî’de ba‘dehû du‘âhânede ma‘kûd meclis-i şer‘-i münîrde arzuhâl eden Kemal v. Yoseb nâm Yahûdî ile es-Seyyid Mustafa b. İsmail hâzır oldukları hâlde Çoban İstoyo v. Hristo nâm zimmî ile terâfu‘larında mersûm İstoyo zimmînin Havâss-ı Refî‘a kazâsına muzâfa Çatalca nâhiyesine tâbi‘ Nakkaş nâm karyede mevcûd ağnâmın südlerinden hâsıl teleme ta‘bîr olunur peynirini her ne mikdâra bâliğ olur ise beher vakıyyesi on dokuz akçeye almak üzere işbu Şa‘bân-ı Şerîf’in on altıncı günü mukâvele ve yedi gün mürûrunda mevcûd peynirini karye-i mezkûrede bana ifâ ve teslîme mu‘âhede etmemizle kethüdâsı Köse nâm zimmîye üç yüz guruşu teslîm ettiğimden bir gün sonra işbu meclisde hâzır es-Seyyid Mustafa dahî çoban-ı mersûm İstoyi zimmîye beş yüz guruşu teslîm ve her vakıyye peyniri ifâ ve teslîme mu‘âhede etmeleriyle mersûm İstoyo hâsıl olan peyniri ber-minvâl-i muharrer mersûm Kemal Yahûdî’ye bey‘ ve teslîm edip bana vermemeğin ben dahî kethüdâya verdiğim meblağ mikdârı peynir taleb ederim deyü alâ tarîkı’s-selem tasaddî eylediğini da‘vâsını cemî‘ şerâyit-i selemi hâvî olmamağın sahîh olmayıp ve meblağ-ı mezkûr üç yüz guruşu dahî mersûm İstoyo zimmînin emr ve tevekkülü yoğiken mücerred müdde‘î-i mersûm kendi re’yiyle teslîm eylediğini mukır ve mu‘terif olmağın mûcebince [44b] müdde‘î-i mersûm İstavraki zimmî husûs-ı mezkûra müte‘allika mersûm Çoban İstoyo zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 9 min Ramazan sene 1202.