İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 167 Hüküm no: 164 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavraki’nin parasını verdiğini iddia ettiği peynirin Kemal’den alınıp kendisine verilmesini talep ettiği Arzuhâl eden İstavraki v. Nikola nâm zimmî meclis-i şer‘-i münîrde Kemal v. Yasef nâm Yahûdî ile terâfu‘larından Çekmece-i Kebîr kurbünde Çatalca Nahîyesi’ne tâbi‘ Nakkaş nâm karyede İstoyo v. Hristo nâm çobanla işbu bin iki yüz iki senesi Şa‘bânı’nın on altıncı günü hâsıl eylediği teleme peynirini beher vakıyyesini on dokuzar akçeye mukâvele verdim mezbûreden yedi gün mukaddem sonra karye-i mezbûrede îfâ ve teslîme mu‘âhede ettiğimizden bir gün sonra ben mâlımdan kethüdâsına üç yüz guruş teslîm edip ve es-Seyyid Mustafa b. İsmail nâm kimesne dahî hâsıl olan peynirden beher vakıyyesini on dokuzar akçeye almak üzere çoban-ı mersûma beş yüz guruşu teslîm ol dahî kabz edip ve hâsıl olan peyniri tarafından ta‘yin eylediği işbu Kemal Yahûdî’ye karye-i mezbûrede îfâ ve teslîm-i mukâvele ve mu‘âhede etmeleriyle hâlâ mersûm Kemal çoban-ı mersûmun hâsıl eylediği peyniri karye-i mezbûrede ahz edip bana vermemekle mersûm Kemal def‘le çoban-ı mersûmun hâsıl eylediği peynir bana verilmek murâdımdır deyü tasaddî eylediği selem da‘vâsına takrîr-i meşrûh üzere çoban-ı mersûm hasm-ı şer‘î olmağın mersûm Kemal Yahûdî’ye suâl teveccüh etmediği İstanbul Mahkemesi’nden huzûr-ı âlîlerine i‘lâm olundu. Fî 9 min Ramazân sene 1202.