İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 167 Hüküm no: 165 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın kasap dükkanı gedik hisse ve aletlerini Simyon v. Dimo’ya sattığı Ma‘rûz Medîne-i Üsküdar’a tâbi‘ Yalıgöl ta‘bîr olunur mahalde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzımeye Kara Mustafa Paşa Vakfı mütevellîsi temessüküyle mutasarrıf Ahmed b. Abdullah tarafından husûs-ı âtîde vekîl olduğu Mustafa b. Ali ve Osman b. Mehmed ve İbrahim b. Ahmed nâm kimesneler şehâdetleriyle lede’ş-şer‘ mütehakkık olan Ali Ağa b. Süleyman meclis-i şer‘-i şerîf-i enverde hâlâ kasabbaşı izzetlü Mehmed Emin Ağa tarafından vekîli kasablar kethüdâsı el-Hâc Ali Ağa ve sâ’ir mazbûtü’l-esâmî kasab ustaları hâzır oldukları hâlde kasab ustası olduğu hâzırûn-ı mezbûrûn haberleriyle zâhir olan Simyon v. Dimo nâm zimmî muvâcehesinde bi’l-vekâle takrîr-i kelâm edip müvekkilim mezbûr Ahmed b. Abdullah mutasarrıf olduğu mârrü’l-beyân bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmesini kendi hüsn ü rızâ ve tayyib-i ihtiyârıyla bedel-i ma‘lûm ve makbûz mukâbelesinde mersûm Simyon zimmîye ferâğ ve tefvîz ol dahî ber-vech-i muharrer tefevvüz ve kabûl etmeğin ba‘de’l-yevm âlât-ı lâzıme-i mezkûrede müvekkilim mezbûrun kat‘â alâkası kalmayıp mersûm Simyon zimmînin hakk-ı mufavvazı olmuşdur deyü eylediği bi’l-vekâle takrîrini mezbûr Simyon tasdîk ve âlât-ı lâzıme-i mezkûre evkâf-ı hümâyûn-ı hazret-i şehriyârîden Üçüncü Selhhâne’ye merbûten defter-i vakfa kayd ve yedine müceddeden temessük i‘tâ olunmak ricâsında olduğu İstanbul Mahkemesi’nden huzûr-ı âlîlerine i‘lâm olundu. Fî 8 min Ramazâni’l-mübârek sene 1202.