İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 168 Hüküm no: 166 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un, mallarını gasbettiği gerekçesiyle el-Hâc Ali Ağa’ya açtığı davasından vazgeçtiği Derûn-ı arzuhâlde mezkûrü’l-ism Nesli Hânım dimekle ma‘rûfe ma‘rifetü’z-zât Ümmügülsüm Hatun bt. Mustafa meclis-i şer‘-i şerîf-i enverde arzuhâl eden el-Hâc Ali Ağa b. Osman mahzarında mezbûr el-Hâc Ali Ağa târîh-i i‘lâmdan mukaddem mâlımdan altı yüz guruş kıymetli ber-mûceb-i defter-i müfredât eşyâ-i ma‘lûmemi gasben ahz etmekle mevcûd ise aynılarını müstehlek ise kıymetlerini bi-tarîkı’z-zamân taleb eylediğimde inkâr eylediğinden mâ‘adâsın nefsini âhara tezvîc murâd ettikde emr ve tevkîlin ile mâlımdan bi-şarti’r-rücû‘ yağlık ve yemenî ve zehâyir vesâ’ir levâzımât akd ve urûsun içün üç yüz guruş sarf ettim deyü benden da‘vâ ve ben dahî inkâr edip beynimizde ba‘de vukû‘i’l-münâza‘a bâ-vesâtat-ı muslıhîn ben da‘vâ-yı mezkûremden fâriğa olup husûs-ı mezkûru ve târîh-i i‘lâma gelince beynimizde cârî bi’l-cümle ahz ve i‘tâ ve mu‘âmelât-ı şettâ ve hukûk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan mezbûr el-Hâc Ali Ağa’nın zimmetini ibrâ-yı âm ile ibrâ ve iskāt eylediğimde ol dahî kezâlik meblağ-ı mezkûr üç yüz guruş mutâlebesine ve târîh-i i‘lâma gelince bi’l-cümle hukûk-ı şer‘iyyeye müte‘allika âmme-i da‘vâdan benim zimmetimi ibrâ’ ve iskāt ve her birimiz âharın ibrâsını kabûl eyledik deyü eylediği bi’l-cümle takrîr-i meşrûhunu mezbûr el-Hâc Ali Ağa tasdîk ve bu vecihle kat‘-ı nizâ‘ eyledikleri huzûr-ı âlîlerine i‘lâm olundu. Fî 13 min Ramazâni’l-mübârek sene 1202.