İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 172 Hüküm no: 172 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnafının nizamlarını ihlal eden Bedir oğlu Mustafa’nın men edilmesi Ma‘rûz Âsitâne-i aliyye ve tevâbi‘inde vâki‘ habbâzân esnâfının kethüdâları İsmail Ağa ve Yiğitbaşı Molla Mehmed ve nizâm ustalarından Ahmed Ağa ve es-Seyyid Ömer Ağa ve Eyüb Ağa ve Kadri Ağa ve es-Seyyid Süleyman Ağa ve Küçük Ali Beşe ve Süleyman Beşe ve Cafer Beşe ve Receb Beşe ve Şaban Beşe nâm kimesneler ile zimmî ustalardan Usta Aleksan ve Usta Bedros ve Usta Abram ve Usta Karabet ve Usta Tokil ve Usta Artan ve Usta Kirkor ve diğer Usta Kirkor vesâ’irleri meclis-i şer‘-i enverde habbâzân esnâfının nizâm ustalarından gâ’ib ani’l-meclis Bedir oğlu Mustafa nâm kimesne kendi hâlinde olmayıp hilâf-ı fermân-ı âlî ve muğâyir-i nizâm-ı kadîm esnâfımızın ihtilâline bâdî harekete tasaddî eylediğine binâ’en mezbûrdan teşekkî ve esnâfımızdan hurûcunu iltimâs eylediğimizde mezbûr Mustafa fîmâ ba‘d kendi kâr-ı kesbiyle meşgûl olup umûr-ı esnâfa kat‘â müdâhale etmemek üzre ta‘ahhüd eyledi deyü her biri haber verdiklerinde kapân tüccârından mazbûtü’l-esâmî kimesneler dahî mezbûrûnu ba‘de’t-tasdîk eğer ba‘de zamân mezbûr Mustafa hilâf-ı ahd-i mezkûr hareket eder ise te’dîb olunmak bâbında fermân-ı âlîleri sudûrunu istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 7 min Şa‘bân sene 1202. Derkenâr: Bâ-mühr-ı efendi sâbık hazretleri