İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 172 Hüküm no: 173 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Penbe Hadice bt. Abdullah’ın boşandığı kocası Mustafa Tahir’den mehir borcundan alacağını tahsil ettiği Ma‘rûz Sâhibe-i arzuhâl mu‘arrifü’z-zât Penbe Hadîce bt. Abdullah meclis-i şer‘-i şerîf-i enverde zevc-i sâbıkı Mustafa Tahir b. Ahmed mahzarında mezbûr Mustafa Tahir benim zevc-i dâhilin olup târîh-i kitâbdan otuz yedi gün mukaddem gurre-i Ramazân’da beni tatlîk etmekle zimmetimde mütekarrir ve ma‘kûdun aleyh mehr-i mü’eccel hakkım olan kırk guruşun otuz guruşunu bana teslîm bâkî on guruşu hâlâ zimmetinde kalmağla meblağ-ı mezbûr ile mecmû‘ı yüz seksen beş guruş kıymetli mihr-i mü’eccel tesmiye olunan iki minder, altı çatma yasdık, bir döşek, iki yorgan, bir baş yasdık, bir çârşebimle, bir yelek nâmıyla bana hibe ve teslîm eylediğini bir çuka ferâce, bir çiçekli hırka, bir anterî ve bir hamâm takımı ve bir yaşmak makraması alıkoyup hâlâ yedinde olmağla taleb eylediğimde ol dahî inkâr etmeğin beynimizde ba‘de vukû‘i’l-münâza‘a bâ-vesâtat-ı muslıhîn da‘vâ-yı mezkûremden mezbûr Mustafa Tahir ile yirmi beş guruş üzerine sulh olduğumda ol dahî sulh-ı mezbûru kabûl ve bedel-i sulh-ı mezkûru yedinden tamâmen kabz edip mâ‘adâ müdde‘âma ve hukûk-ı zevciyyete müte‘allika âmme-i da‘vâdan her birimiz âharın zimmetini ibrâ’ ve iskāt ve her birimiz âharın ibrâsını kabûl eyledik deyü eylediği bi’l-cümle takrîr-i meşrûhunu mezbûr Mustafa Tahir tasdîk ve bu vecihle kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 7 L. sene 1202.