İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 173 Hüküm no: 175 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnafının nizamını ihlal eden Karabet’in ihtiyar olması sebebiyle ceza olarak Gümüşhane’ye sürgüne gönderilmesinin talep edildiği Ma‘rûz [Ma‘rûz] Habbâzân Kethüdâsı İsmail Ağa ve nizâm ustaları vesâ’ir mazbûtü’l-esâmî Müslim ve zimmî ihtiyâr ve ustalar meclis-i şer‘-i şerîf-i enverde Çörekçiler Kethüdâsı Hâfız es-Seyyid İbrahim vesâ’ir mazbûtü’l-esâmî çörekçi ve simidçi ustaları ve habbâzân esnâfı iltimâslarıyla Ağakapısı’nda habs olunan Tekfursarayı’nda vâki‘ francala fırını ustası Karabet zimmînin küfecilerinden Mumcu Hasan mübâşeretiyle ihzâr olunan Kurt ve Hristo ve Saltoki nâm zimmîler muvâcehelerinde Âsitâne-i aliyye ve bilâd-ı selâsede vâki‘ francala fırınlarında tabh olunan nân francala destgâhlarında kendilere mahsûs ve müte‘ayyin ma‘lûmü’l-aded küfecileriyle maktû‘ olan hudûdları esvâk ve bazarında bey‘ olunup saray-ı cedîd ve saray-ı atîk ve saray-ı sadr-ı a‘zamî ve Ağakapısı fırınlarında vâki‘ bakkâl dükkânlarından mâ‘adâ bakkâl ve manav ve südcü ve yoğurtcu ve şerbetci ve aslâ bir sınıfın dükkânlarına francala vaz‘ ve bey‘ olunmayıp ve simidci ve çörekci esnâfı dahî kendilere mahsûs simid ve kürek ve çörek ve börek ve boğaca ve kâhî ve yağlı halka ve bunun emsâli mazbûhât işleyip Şam halkası peksimât bezli pide ve hâs etmek tabh ve bey‘ etmeyip beyhûde dakîk telefinden vikâye birle şurût-ı nizâm-ı mezkûr düstûrü’l-amel olup hilâf-ı hareket eder olur ise Müslim ise san‘atdan ba‘de’l-ihrâc diyar-ı ba‘îd nefy ve iclâ zimmî ise kezâlik san‘atından ba‘de’l-ihrâc sefâyin-i mülûkâneye vaz‘ ve te’dîb ve ta‘dîl olunmak üzre başmuhâsebeye kayd birle yedimize işbu tuğrâlı emr-i âlî i‘tâ olunmuşiken hilâf-ı emr-i âlî ve muğâyir-i nizâm çörekci ve simidci hâs etmek tabh ve bey‘ ve francalacılar dahî her mahalle francala vaz‘ ve beyhûde külliyetlü dakîk telef eyledikleri zahîr olup hattâ mersûm Karabet zimmî tablakârları mersûmûn ile Çarşamba Pazarı’nda ve Sarmaşık’da bakkâl dükkânlarına ve mahâll-i sâ’ireye francala irsâl ve vaz‘ı âşikâr olmağla ahz olunmağın fîmâ ba‘d hilâf-ı emr-i âlî ve muğâyir-i nizâm hareket etmemek üzre çörekci ve simidci esnâfına tenbîh olunup ve ibreten li’s-sâ’irîn mersûm Karabet zimmî dahî emr-i âlîde tasrîh olunduğu vech üzere te’dîb olunmak murâd[ım]dır deyü bir kıt‘a emr-i âlî ibrâzıyla eyledikleri bi’l-cümle takrîrlerin ba‘de’t-tasdîk fîmâ ba‘d hilâf-ı emr-i âlî ve muğâyir-i nizâm hareket etmemek üzere her birin tenbîh olunduğu ve habbâzân kethüdâ ve ustaları mersûm Karabet zimmî ihtiyâr olmağla sefâyin-i mülûkâneye vaz‘a şâyeste olmayıp te’dîben ve ibreten li’s-sâ’irîn maskat-ı re’s olan Gümüşhâne kazâsına tâbi‘ Mevkan karyesine nefy ve iclâ olmasını istid‘â eyledikleri [47a] İstanbul Mahkemesi’nden huzûr-ı âlîlerine i‘lâm olundu. Fî 10 min Şevvâl sene 1202.