İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 174 Hüküm no: 176 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çizmecibaşı Vakfı’na ait Tahtahân bitişiğindeki evin, haremi tarafındaki boş arsaya hilâf-ı kanun odalar yapılıp hâna eklendiği bunların hândan ayrılarak eve birleştirilmesi gerektiği Ma‘rûz Sâdır olan fermân-ı âlîlerine imtisâlen kıbel-i şer‘den mürsel İkinci Kâtib Merhabazâde Mevlânâ Mahmud Efendi hâssa mi‘mârı kalfasından Ali Reşid ve Ömer Halîfeler ile İstanbul’da Mahmudpaşa mahallesinde kâ’in sagîr Tahtahân’a varıp huzûr-ı Müslimi’nde ba‘de akdi’l-meclis ashâb-ı arzuhâl mahalle-i mezbûre ahâlîsinden Arzuhalci es-Seyyid el-Hâc Ahmed Efendi b. el-Hâc Ali ve İmâm es-Seyyid Sadullah Efendi ve es-Seyyid İbrahim Ağa b. es-Seyyid Ahmed ve el-Hâc İbrahim b. Mehmed ve Yusuf b. Ali ve el-Hâc Mehmed b. Ali ve Câmeşuycu Ali b. Abdullah ve Hasan b. Mehmed nâm kimesneler meclis-i ma‘kûd-ı mezkûrda derûn-ı arzuhâlde mezkûrü’l-ism es-Seyyid Ahmed b. el-Hâc Mustafa’nın zevcesi ve tarafından âti’l-beyânda vekîl olduğu Hasan Usta b. İsmail ve Süleyman b. Hasan şehâdetleriyle sâbit olan ma‘rifetü’z-zât Şerife Hafîze bt. es-Seyyid Ebâbekir nâm hatun mahzarında zikri âtî vakfın mütevellîsi tarafından câbî-i vakf es-Seyyid İbrahim Efendi hâzır olduğu hâlde işbu derûnunda akd-i meclis olunan Çizmecibaşı vakfından bir bâb sagîr Tahtahân ve ittisâlinde kâ’in bir bâb menzil müvekkil-i mezbûrun taht-ı tasarrufunda olmağla bu esnâda menzil-i mezbûrun haremi tarafından tûlen sekiz ve arzen beş zirâ‘ bi-hesâb-ı terbî‘i cem‘an kırk zirâ‘ mahal üzerinde mebnî ulyâda bir bâb ve vustâda bir bâb odalarını tenzîl ve tağyîr ve hâmiş-i arzuhâlde muharrer derkenâr nâtık olduğu üzere hilâf-ı hatt-ı hümâyûn hân-ı mezkûra zam ve ilhâk ve ulyâda bir bâb oda ve bir mikdâr sofa ve vustâda iki oda ve bir sofa ve süflâda bir bâb oda ihdâs etmekle menzil-i mezkûrdan müfrezen ve hâdisen hân-ı mezkûra zam olunan odalar kemâ fi’l-evvel menzil-i mezkûra idhâl olunmak murâdımızdır deyü her biri ba‘de’d-da‘vâ ve’l-istintâk vekîl-i mezbûr cevâbında zikr olunan odalar menzil-i mezkûrdan ifrâz ve muğâyir-i hatt-ı hümâyûn hân-ı mezkûra zam ve ilhâk olup muhdes olduğunu tasdîk edip zikr olunan odaları kemâ fi’l-evvel menzil-i mezkûra idhâl ve tanzîme ve zikr olunan odalar tahtında vâki‘ bi’r-i mâ’ kadîmden beru hân tarafından isti‘mâl olunmak üzre bi’l-vekâle ta‘ahhüd eyledikde ahâlî-i merkûmûn dahî râzı ve bu vecihle kat‘-ı nizâ‘ eylediklerini kâtib-i mezbûr mahallinde ketb ve tahrîr ve ma‘an mürsel ümenâ’-i şer‘le meclis-i şer‘a gelip alâ vukû‘ihî inhâ ve takrîr eyledikleri huzûr-ı âlîlerine i‘lâm olundu. Fî 10 min Şevvâl sene 1202.