İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 177 Hüküm no: 178 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Halil’in gemi ile Midye’den İstanbul’a getirip Toros’un oğlu Agob’un el koyduğu kömürün bahası için Toros’a açtığı davanın reddolunduğu Ma‘rûz Arzuhâl eden es-Seyyid Halil b. İsmail meclis-i şer‘-i şerîf-i enverde Sarrâf Toros v. David nâm zimmî ile terâfu‘larında hâlâ Âsitâne-i aliyye’de Ayazma iskelesinde merbût Karadeniz sefinelerinden çenber ta‘bîr olunur bir kıt‘a sefinenin nısfı mersûm Toros zimmînin ve nısf-ı âharı Kömürcü Ahmed b. Davud nâm kimesnenin mülkleri olmağla merkûm Kömürcü Ahmed sefîne-i mezkûrenin re’isi Markar nâm zimmîye mâlı olup Karadeniz sevâhilinde Midye nâm mahalde mevcûd kömüründen sefine-i mezkûreye vaz‘ ve tahmîl ve Âsitâne’ye lede’l-vüsûl ahz ve âhara bey‘ ve kabz olunan semenden navl-ı sefîne ve mesârif-i sâ’iresini ba‘de’l-edâ bâkîsini hıfz ve kendiye îsâle dahî beni nasb ve ta‘yîn etmekle re’is-i merkûm emr-i mezkûra binâ’en merkûm Ahmed’in sâlifü’z-zikr Midye’de olan kömüründen beher arabası beşer yüz vakıyye olmak üzere üç yüz otuz beş araba kömür ahz ve sefineye vaz‘ ve tahmîl ve bin iki yüz iki senesi Muharremi’nin evâ’ilinde Âsitâne’ye vâsıl oldukda mersûm Toros zimmînin oğlu Agob nâm zimmî sefînenin nısfı babamın mülkü olmağla kömür babamın malıdır deyü bi-gayr-i hakkin zikr olunan kömürü sefineden ihrâc ve gasben ahz ve istihlâk edip mersûm Toros mücerred gâsib-i mersûmun babası olmağla gasb olunan kömürün kıymetini bi-tarîkı’z-zamân mersûm Toros zimmîden bi’l-vekâle taleb ederim deyü tasaddî eylediği da‘vâsı takrîr-i meşrûh üzere meşrû‘a ve iltifâta şâyân olmadığı İstanbul Mahkemesi’nden huzûr-ı âlîlerine i‘lâm olundu. fî 13 min L. sene 1202.