İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 178 Hüküm no: 180 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asiye Hatun ile kocası İsmail Ağa’yı eski damatları el-Hâc Mehmed’in darb ettiği Sâdır olan fermân-ı âlîlerine imtisâlen sâhibe-i arzuhâl ma‘rifetü’z-zât Asiye Hatun bt. Mehmed ve zevci zu‘emâdan İsmail Ağa b. Halil Çarşamba günü Dîvân-ı âlîleri’nde ba‘de dâ‘îhânede ma‘kûd meclis-i şer‘-i şerîf-i enverde derûn-ı arzuhâlde mezkûr hâssa hasekîlerinden Parmaksız el-Hâc Mehmed Ağa b. Mustafa ile terâfu‘larında merkûm el-Hâc Mehmed bundan akdem dâmâdımız olup zevce-i menkûhası olan kerîmemiz Havvâ Hatun ile adem-i imtizâclarına binâ’en muhâla‘aten beyinleri tefrîk olundukdan sonra târîh-i i‘lâmdan mukaddemce Ayasofya’da imâm menzili olan mahalde merkûm el-Hâc Mehmed bize tesâdüf edip yumruk ile başımıza ve yüzümüze darb ve şetm etmekle mûcib-i şer‘îsi icrâ olunmak murâdımızdır deyü da‘vâ ol dahî fi’l-hakîka merkûmân ile mahâll-i mezbûrede tasarrufunu ikrâr darb ve şetmini inkâr eylediğinden mâ‘adâ merkûmân beni yumruk ile başıma ve elime darb ve şetm etmişlerdir deyü mûcib-i şer‘îsini da‘vâ anlar dahi inkâr edip beyinlerinde ba‘de vukû‘i’l-münâza‘a bâ-vesâtat-ı muslıhîn her biri ber-vech-i muharrer eyledikleri da‘vâlardan fâriğler ve zimmetlerini ibrâ ve iskāt ve kubûl eylediklerinden sonra mezbûr el-Hâc Mehmed fîmâ ba‘d merkûmânın taraflarına varmayıp ve aslâ bir husûsuyla münâkaşa ve mukâvemet etmemeğe ta‘ahhüd edip ve merkûm el-Hâc Mehmed’den min ba‘d merkûmâna aslâ ve kat‘â zarar-ı şer‘î gelmeyeceğine Ayasofya mahallesi ahâlîsinden ve Tahvîl kalemi ketebesinden Kaftânî el-Hâc Ebubekir [48b] Efendizâde İbrahim Efendi ve Büyük Ruznâmçe kalemi ketebesinden mîrî kaftancı el-Hâc Mehmed Ağazâde Mehmed Sadık Efendi kefîl oldukları İstanbul Mahkemesi’nden huzûr-ı âlîlerine i‘lâm olundu. Fî 13 L. sene 1202.