İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 179 Hüküm no: 181 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Margarid v. Kiryako’nun kasap dükkanı gedik hisse ve aletlerini Kıritso v. Nano’ya sattığı Ma‘rûz Evkâf-ı hümâyûn-ı hazret-i şehriyârîden Yedikule hâricinde vâki‘ Beşinci Selhhâne’ye merbût olup İstanbul’da Kumkapı kurbünde Nişancı Çarşısı’nda hamâm karşısında köşebaşında sebzeciye muttasıl bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısfına mütevellî-i vakf temessüküyle mutasarrıf Margarid v. Kiryako nâm zimmî meclis-i şer‘-i münîrde hâlâ kasabbaşı izzetlü Mehmed Emin Ağa tarafından vekîli kasab kethüdâsı el-Hâc Ali Ağa ve Yiğitbaşı Derviş Ağa ve ustalardan Mehmed Said Ağa ve Yeğen Osman hâzırlar oldukları hâlde kasab ustası olduğu hâzırûn-ı merkûmûn haberleriyle zâhir olan Kıritso v. Nano nâm zimmî muvâcehesinde mutasarrıf olduğum mârrü’l-beyân nısf alât-ı lâzıme-i ma‘lûmeyi hüsn-ı rızâ ve tayyib-i ihtiyârım ile bedel-i ma‘lûm ve makbûz mukâbelesinde mersûm Kıritso zimmîye bâ-re’y-i mütevellî ferâğ ve tefvîz olduğu tefevvüz ve kabûl edip ba‘de’l-yevm zikr olunan nısf alât-ı lâzıme-i mezkûrede benim kat‘â alâka ve medhalim kalmayıp mersûm Kıritso zimmînin mülkü olmuşdur deyü eylediği takrîrini mersûm Kıritso zimmî tasdîk ve nısf alât-ı mezkûre kendi üzerine olmak üzere defter-i vakfa kayd ve yedine memhûr temessük i‘tâ olunmak ricâsında olduğu İstanbul Mahkemesi’nden huzûr-ı âlîlerine i‘lâm olundu el-emru li-menlehü’l-emr. Fî 14 min Şevvali’l-mükerrem sene 1202.