İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 179 Hüküm no: 182 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah ile kardeşi Mehmed’in kiralayıp daha sonra terk ettikleri kumanyacı dükkanını tekrar kiralamak için mal sahibine açtıkları davanın reddolunduğu Ma‘rûz Arzuhâl eden Abdullah ve karındaşı Mehmed nâm kimesneler meclis-i şer‘-i şerîf-i enverde zikri âtî dükkânın mâlikesi olup hâlâ vazı‘atü’l-yed olan Şerîfe Hadîce bt. Abdullah’ın zevci ve tarafından vekîli el-Hâc Mustafa Ağa b. Hasan ile terâfu‘larında mahmiyye-i İstanbul hısnı ebvâbından Ayazmakapısı hâricinde vâki‘ bir bâb kumanyacı dükkânının bundan akdem biz müşâhereten müste’ciri olup derûnunda mevcûd eşyâsı dahî gedik olmak üzere bizim mallarımız iken sermâyemiz telef olup kâr u kesbe kudretimiz olmamağın dükkân-ı mezkûru mukaffelen terk ve yirmi yedi ay kirâsını mutasarrıfesi mezbûre Şerîfe Hadice Hatun’a edâ etmemiz ile mezbûre Şerîfe Hadîce Hatun’un zevci ve tarafından vekîli mezbûr el-Hâc Mustafa Ağa işbu bin iki yüz iki senesi Muharremi gurresinden İstanbul Mahkemesi’nde Başkâtib Mevlânâ Ahmed Efendi ile kıbel-i şer‘den me’zûnen dükkân-ı mezkûru küşâd ve derûnunda mevcûde mâlımız olan iki aded zeytun fıçısını ihrâc ve dükkân-ı mezkûru kıbel-i şer‘den vekîl-i mezbûra teslîm olunup lâkin dükkân-ı mezkûr mücerred bizim gediğimiz olmağla kemâ fi’s-sâbık biz istikrâ ederiz deyü eyledikleri da‘vâları takrîr-i meşrûhları üzre meşrû‘a ve iltifâta şâyân olmadığı İstanbul Mahkemesi’nden huzûr-ı âlîlerine i‘lâm olundu. Fî 17 min L. sene 1202.