İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 180 Hüküm no: 183 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müezzin es-Seyyid Mehmed Emin’in türbe üzerine yaptığı binanın balkonunun, bitişiğindeki eve zarar vermesi sebebiyle yıkılması Ma‘rûz Sâdır olan fermân-ı âlîlerine imtisâlen kıbel-i şer‘den mürsel İkinci Kâtib Merhabâzâde Mahmud Efendi hâssa mi‘mârı hulefâsından İsmail ve es-Seyyid Abdullah Halîfeler ile İstanbul’da [49a] Kırkdört kapısı’nda Muhyiddin Kırımî mahallesinde vâki‘ münâza‘un fîh olan bir bâb menzile varıp huzûr-ı müslimînde ba‘de akdi’l-meclis menzil-i mezbûr ittisâlinde bir bâb menzile mutasarrıf olan sipâh çavuşlarından es-Seyyid Ali Çavuş Ağa b. es-Seyyid Mehmed tarafından vekîl-i şer‘îleri zâtları mu‘arrefe olan zevcesi Hadîce bt. Mustafa ile kızı sâhibe-i arzuhâl Şerîfe Âişe Hatun meclis-i ma‘kûd-ı mezkûrda derûn-ı arzuhâlde mezkûrü’l-ism Müezzin es-Seyyid Mehmed Emin b. Cürcânî Mehmed Ali muvâcehesinde mezbûr Müezzin es-Seyyid Mehmed Emin bu esnâda binâsına şürû‘ eylediği menzilinin müvekkilemiz mezbûrun menzili ittisâlinde vâki‘ türbe üzerine inşâ ve ihdâs eylediği binânın menzilimizin köşe penceresinde mazarratı olmağla men‘ olunmasını bi’l-vekâle murâdımızdır deyü da‘vâ ve ba‘de vukû‘i’l-münâza‘a beynlerine muslihûn tavassut edip zikr olunan türbe üzerine binâ ve inşâ olunan mahalde tûlen dört zirâ‘ ve kadden on sekiz parmak ihdâs eylediği şehnişîni bi’l-külliye ref‘ ve mârrü’z-zikr türbe üzerinde olan mahâllin sütûnunu müvekkil-i mezbûrun mevcûd penceresinin pervâzı üzerinden dikmek üzere ta‘ahhüd eyledikde mezbûretân dahî râzı ve bu vecihle kat‘-ı nizâ‘ eylediklerini kâtib-i merkûm mahallinde ba‘de’t-tahrîr mezbûrûn ile ma‘an ümenâ’-i şer‘le meclis-i şer‘a gelip muvâcehelerinde inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 18 min Şevvâl sene 1202.