İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 181 Hüküm no: 185 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sagome bt. Karabet’in ev hissesini kendisini Kudüs’e götürmesi ve bakması karşılığı, oğlu Serope’ye ferağının meşru olmadığından evin tekrar Sagome’ye iade edilmesinin tenbih olunduğu Ma‘rûz Arzuhâlde mezkûre Sagome bt. Karabet nâm Nasrâniye tarafından husûs-ı âtîde vekîl olduğu şahsı ârifân Karabet v. Yasef ve Evakim v. Karabet nâm zimmiler şehâdetleriyle sâbit olan Agob v. Kirkor nâm zimmî meclis-i şer‘-i şerîf-i enverde zikri âtî vakfın mütevellîsi Mustafa Ağa tarafından vekîli es-Seyyid Hüseyin b. Hasan hâzır olduğu hâlde müvekkilem mersûmenin sadrî kebîr oğlu hâmil-i arzuhâl Serope v. Avanes nâm zimmî ile terâfu‘larında müvekkile-i mersûme bi’l-icâreteyn tasarrufunda olup eyvân dâhilinde Atîk Mustafapaşa mahallesinde vâki‘ beyne’l-ahâlî ve’l-cîrân ma‘lûmü’l-hudûd ve’l-müştemilât Küçük İsmail Ağa Vakfı’ndan bir bâb vakf menzilin nısfını bin yüz doksan senesi [49b] kendiyi Kudüs-ı Şerîf’e götürüp olanca görüp gözetmek üzre bâ-re’y-i mütevellî oğlu mersûm Serope zimmîye ferâğ edip lâkin şart-ı mezkûre binâ’en ferâğ-ı mezbûr mu‘teber olmamağla hâlâ nısf-ı menzil-i mezkûru müvekkilim mezbûra bâ-re’y-i mütevellî istirdâd eder deyip ve mersûm Serope zimmî anam müvekkilem mersûmenin emriyle bi-şarti’r-rücû‘ mâlımdan menzil-i mezkûrun ta‘mîrine sarf eylediğim altı yüz guruş mukâbelesinde menzil-i mezkûru bâ-re’y-i mütevellî bana bilâ şart-ı fâriga olmuşdur deyü şart-ı mezkûru inkâr edip ferâğ-ı mezkûrun şart-ı mezbûre üzere olduğunu vekîl-i mezbûr beyândan izhâr-ı acz edip tahlîfe dahî tâlib olmamağın husûs-ı mezkûra müte‘allika müvekkile-i mersûme Sagome Nasrâniye oğlu mersûm Serope zimmîye bilâ beyyine mu‘âraza etmemek içün vekîl-i mersûm Agob zimmiye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 23 min L. sene 1202.