İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 182 Hüküm no: 186 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mehmed’in kasap dükkanı gedik hisse ve aletlerini el-Hâc Ömer Ağa’ya sattığı Ma‘rûz Ebâ Eyyûb-ı Ensârî -radiye anhu Rabbuhü’l-Bârî- Evkâfı’ndan olup medîne-i mezbûre ve Eğrikapı hâricinde vâki‘ selhhânelere merbût Yemiş iskelesinde vâki‘ bir bâb kasab dükkânı derûnunda mevcûde gedik ta‘bîr olunur âlât-ı lâzımenin nısfına mütevellî-i vakf temessüküyle mutasarrıf olan İbrahim b. Mehmed meclis-i şer‘-i şerîf-i enverde hâlâ kasabbaşı izzetlü Mehmed Emin Ağa tarafından vekîli kethüdâ Ebubekir Ağa ve ustalardan es-Seyyid Mehmed Ağa ve Said Ağa ve Abdülhalim hâzırlar olduğu hâlde kasab ustası olduğu merkûmûn haberleriyle zâhir olan el-Hâc Ömer Ağa b. Ali mahzarında ikrâr ve takrîr-i kelâm edip mutasarrıf olduğum nısf âlât-ı mezkûreyi hüsn-ı rızâ ve tayyib-i ihtiyârımla bedel-i ma‘lûm ve makbûz mukâbelesinde bâ-re’y-i mütevellî işbu merkûm el-Hâc Ömer Ağa’ya ferâğ ve tefvîz ol dahî tefevvüz ve kabûl etmeğin ba‘de’l-yevm nısf âlât-ı mezkûrede benim kat‘â alâkam kalmayıp merkûm el-Hâc Ömer Ağa’nın hakk-ı mufavvazı olmuşdur dedikde gıbbe’t-tasdîk merkûm el-Hâc Ömer Ağa nısf âlât-ı mezkûre kendi üzerine defter-i vakfa kayd ve yedine temessük i‘tâ olunmak ricâsında olduğu İstanbul Mahkemesi’nden huzûr-ı âlîlerine i‘lâm olundu. Fî 23 min Şevvâl sene 1202.