İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 182 Hüküm no: 187 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oturakcı Mığırdıç v. Avanes’in sarrâc esnafı nizamının hilafına hareket etmesinden dolayı küreğe vaz olunarak cezalandırılmasının talep edildiği Ma‘rûz Âsitâne-i aliyye’de Sarrâchâne’de sâkin sarrâc esnâfının kethüdâları Salih Efendi ve yiğitbaşıları Salih Usta ve ustalarından es-Seyyid el-Hâc Ali Usta ve Mustafa Efendi ve Süleyman Ağa ve Hüseyin Ağa ve Abdullah Çelebi ve diğer Salih Usta ve el-Hâc Mustafa Usta ve Mehmed Emin Usta vesâ’irleri meclis-i şer‘-i enverde İstanbul’da Bitbazarı’nda Oturakcı Mığırdıç v. Avanes nâm zimmî muvâcehesinde kadîmü’l-eyyvâmdan beru bey‘ u şirâsı sarrâc esnâfına mahsûs olan sarrâc metâ‘ı Saraçhâne’den gayrı mahallerde bey‘ u şirâ olunmamak üzre bâlâsı hatt-ı hümâyûn-ı inâyet-makrûn ile mu‘anven yedimize emr-i âlîşân vesâ’ir müte‘addid evâmir-i aliyyeler i‘tâ olunup nizâm-ı kadîmimiz vech-i muharrer üzere düstûrü’l-amel iken merkûm Mığırdıc zimmî hilâf-ı hatt-ı hümâyûn ve muğâyir-i nizâm-ı kadîm bey‘ u şirâsı sarrâc esnâfına mahsûs olan bi’l-cümle sarrâc emti‘ası Bitbazarı’nda vâki‘ oturakcı dükkânında ibâdullâha bey‘ ve nizâm-ı kadîmimizin ihtilâline bâdî olmağla hilâf-ı hatt-ı hümâyûn hareketine binâ’en merkûm Mığırdıç zimmî ibreten li’s-sâ’irîn Tersâne-i âmirede küreğe vaz‘ olunmak bâbında fermân-ı âlîleri sudûrunu istid‘â eyledikleri mübâşirleri Yazıcı İbrahim Efendi yediyle İstanbul Mahkemesi’nden huzûr-ı âlîlerine i‘lâm olundu. Fî 24 min Şevvâl sene 1202.