İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 183 Hüküm no: 188 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fincancı Zakar v. Asvadar’ın sarrâc esnafı nizamının hilafına hareket etmesi sebebiyle uyarılması Ma‘rûz Âsitâne-i aliyye’de Sarachâne’de sâkin sarrâc esnâfının kethüdâları Salih Efendi ve yiğitbaşıları Salih Usta ve ustalarından es-Seyyid el-Hâc Ali Usta ve Mustafa Efendi ve Süleyman Ağa ve Hüseyin Ağa ve Abdullah Çelebi ve diğer Salih Usta ve el-Hâc Mustafa Usta ve Mehmed Emin Usta vesâ’irleri meclis-i şer‘-i enverde İstanbul’da Sultân Bâyezid-i Velî Câmi‘-i Şerîfi civârında mütemekkin Fincancı Zakar v. Asvadar nâm zimmî muvâcehesinde kadîmü’l-eyyâmdan beru bey‘ ve şirâsı sarrâc esnâfına mahsûs olan sarrâc metâ‘ı Saraçhâne’den gayrı mahallerde bey‘ u şirâ olunmamak üzere bâlâsı hatt-ı hümâyûn inâyet-makrûn ile mu‘anven yedimizde emr-i âlîşân vesâ’ir müte‘addid evâmir-i aliyyeler i‘tâ olunup nizâm-ı kadîmimiz vech-i muharrer üzere düstûrü’l-amel iken merkûm Zakar hilâf-ı hatt-ı hümâyûn ve muğâyir-i nizâm-ı kadîm bey‘ u şirâsı sarrâc esnâfına mahsûs olan fincan kutusunu dükkânında ibâdullâha bey‘ ve nizâm-ı kadîmimizin ihtilâline bâdî olur deyü teşekkî ve te’dîbini iltimâs eylediklerinde merkûm Zakar zimmî fîmâ ba‘d bey‘ u şirâsı Saraçhâne’de sarrâc esnâfına mahsûs olan fincan kutusunu dükkânında bey‘ u şirâ etmemek üzere ta‘ahhüd ve eğer hilâf-i ahd mezkûr hareketi zuhûr eder ise hakkında iktizâ eden te’dîbe râzı oldukda esnâf-ı mezbûrûn dahî teşekkîlerinden fâriğ oldukları mübâşirleri Yazıcı İbrahim Efendi yediyle İstanbul Mahkemesi’nden huzûr-ı âlîlerine i‘lâm olundu. Fî 24 min Şevvâl sene 1202.