İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 184 Hüküm no: 189 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mehmed’in büluğa erdiği için babasından kalan malları annesinden talep ettiği Ma‘rûz Arzuhâl eden Derviş Mehmed b. Mustafa meclis-i şer‘-i şerîf-i enverde hâl-i sıgârında vasîsi vâlidesi ma‘rifetü’z-zât Fatma Hatun bt. Mehmed Said Efendi ile terâfu‘larında ben on beş yaşında olup rüşdüm bâliğa munzam olmağla bey‘-i sâlib ve şirâ’en câlib olduğunu âlim ve mâlımı hıfz ve umûrumu bi’n-nefs görmeğe kādir ve ol vecihle i‘ânet-i vasîden müstağnî olmamla vâlidem mezbûre yedinde olan elli sekiz guruş mâlımı taleb ve babam müteveffâ-yı mezbûrdan müntakil ve bana tevcîh olunan cihâtım umûrunu bi’n-nefs rü’yet ve tasarruf murâd eylediğimde vâlidem mezbûre edâdan imtinâ‘ ve tasarrufdan beni men‘ eder deyü da‘vâ ettikde mezbûre Fatma Hatun cevâbında oğlu müdde‘î-i mezbûrun elli sekiz guruş mâlı yedinde olduğunu ve cihâtı umûrunu tasarrufdan men‘ eylediğini ikrâr edip mâ‘adâ müdde‘âsını inkâr etmeğin müdde‘î-i mezbûr ber-vech-i muharrer müdde‘âsını udûlden İmâm Osman Efendi b. Mehmed ve Mehmed Ağa b. Ahmed ve Mustafa Efendi b. Ahmed ve Mehmed Ağa b. Osman şehâdetleriyle vâlidesi elli sekiz guruş müdde‘î-i mezbûra edâ ve teslîme ve ba‘de’l-yevm cihâtı umûrunu tasarrufdan men‘ etmemeğe tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 25 min Şevvâl sene 1202. Ma‘rûz