İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 184 Hüküm no: 190 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Zübeyde ile kardeşi Fatma’ya babalarından intikal eden arsayı kiraya vermelerine karışılmaması Ma‘rûz Bâ-işâret-i aliyye sâdır olan fermân-ı âlîlerine imtisâlen savb-ı şer‘-i enverden mürsel Başkâtib Ahmed Efendi nezâret-i hazret-i şeyhü’l-islam-ı sallemehü’s-selâmîde âsûde evkâf müfettişi müderrisîn-i kirâmdan fazîletlü Salih İsmail Efendi tarafından mürsel müderrisîn-i kirâmdan Abdülkadir Efendi ve hâssa mi‘mârı hülefâsından es-Seyyid Mehmed ve es-Seyyid Mustafa Halîfeler ile İstanbul’da Şehzâde Câmi‘-i Şerîfi kurbünde Ayaz Nureddin mahallesinde vâki‘ mevâlî-i izâmdan sâbıkan Şâm-ı Şerîf kadısı merhûm Karslı Mehmed Efendi’nin hayâtında bi’l-icâreteyn tasarrufunda olan muhterik menzili arsasına varıp huzûr-ı Müslimîn’de ba‘de akdi’l-meclis ashâb-ı arzuhâl Eşkinci Bâlî Vakfı mütevellîsi el-Hâc Mustafa Efendi b. İbrahim ile İsa Çelebi Vakfı mütevelliyeleri ma‘rifetü’z-zât Şerîfe Zübeyde ve Fatma bintey Mustafa nâm hatunlar meclis-i ma‘kûd-ı mezkûrda merhûme Şahhuban Hatun Vakfı mütevellîsi mevâlî-i izâmdan sâbıkan Edirne kadısı fazîletlü Mustafa Usameddin Efendi b. Abdullah Tayyib Efendi taraflarından vekîl olduğu Mehmed Emin Efendi b. Mustafa ve Hasan b. Ali şehâdetleriyle sâbit olan Sultân Bâyezid-i Velî Câmi‘-i Şerîfi imâmı İbrahim Efendi b. Mehmed mahzarında işbu derûnunda akd-i meclis olunan muhterik menzil arsasının bir tarafdan su terâzisi ve bir tarafdan Şahhubân Hatun Vakfı’ndan arsa ve bir tarafdan İsa Çelebi Vakfı’ndan arsa ve bir tarafdan tarîk-i âm ile mahdûd ve su terâzisi hizâsından tarîk-i âm tarafı tûlen on üç ve arzen altı zirâ‘ on dokuz parmak terbî‘an seksen sekiz zirâ‘ yedi parmak mahâlli mârrü’z-zikr Eşkinci Bâlî Vakfı’ndan ve bir tarafdan ba‘zen Eşkinci Bâlî Vakfı’ndan mârrü’z-zikr arsa ve ba‘zen Şahhuban Hatun Vakfı’ndan arsa ve menzil ve bir tarafdan ba‘zen Fazıl Mahmud Efendi Medresesi ve ba‘zen İsa Çelebi Vakfı’ndan Berber Yusuf tasarrufunda olan menzil ve iki tarafdan tarîk-i âm ile mahdûd tûlen ve arzen bi-hesâb-ı terbî‘i altı yüz otuz sekiz buçuk zirâ‘ üç parmak mahalli sâlifü’z-zikr İsa Çelebi Vakfı’ndan ve mâ‘adâ terbî‘an dört yüz altı zirâ‘ mahâllî Şahhuban Hatun Vakfı’ndan merhûm-ı mûmâileyh Karslı Mehmed Efendi’nin hayâtında bi’l-icâreteyn tasarrufunda iken mûmâileyh Karslı Mehmed Efendi bilâ-veled fevt ve arsa-i mezkûre mahlûl ve evkâf-ı mezkûreye â‘id ve râci‘ oldukda biz mârrü’z-zikr Eşkinci Bâlî ve İsa Çelebi ve kalfalarına â‘id olan mahalleri âhara îcâr murâd eylediğimizde müvekkil-i mûmâileyh arsa-i mezkûrenin mecmû‘ını mârrü’z-zikr evkâf-ı selâseden cümlemiz ma‘an âhara îcâr ve bedelini hissemize göre iktisâm edelim deyü bizim başka başka âhara îcârımıza mumâna‘at etmekle mârrü’z-zikr Eşkinci Bâlî ve İsa Çelebi Vakıflarından olan mahaller ifrâz ve ta‘yîn ve tecdîd ve her birimiz mu‘accele-i misliyeleriyle bi’t-tevliye âhara îcâr olunmak matlûbumuzdur dediklerinde vekîl-i mezbûr İbrahim Efendi dahî cevâbında işbu muhterik menzil arsası derûnunda vakfeyn-i mezkûreynin arsaları olduğunu ikrâr lâkin hudûd ve zirâ‘ı müvekkilim mûmâileyhin ma‘lûmu değildir dedikde mi‘mârân-ı mezbûrân mesâhalarıyla bâlâda mezkûr seksen sekiz zirâ‘ yedi parmak ve hudûd-ı mezkûre ile mahdûde arsa Eşkinci Bâlî Vakfı’ndan olduğunu müdde‘î-i mezbûr el-Hâc Mustafa Efendi ve terbî‘an altı yüz otuz sekiz buçuk zirâ‘ üç parmak arsa hudûd-ı merkûme ile mahdûde İsa Çelebi Vakfı’ndan olduğunu mezbûretân Şerîfe Zübeyde ve Fatma Hatunlardan her biri lede’t-tezkiye udûlden oldukları ihbâr olunan ikinci Numan Usta b. Mehmed ve Çıkrıkcı Mehmed Ağa b. el-Hâc Ahmed şehâdetleriyle ta‘yin-i hudûd ederek vekîl-i mezbûr muvâcehesinde vech-i şer‘î üzere isbât etmeğin mûcebince mârrü’z-zikr seksen sekiz zirâ‘ yedi parmak arsayı mezbûr el-Hâc Mustafa Efendi ve altı yüz otuz sekiz buçuk zirâ‘ üç parmak arsayı dahî mezbûretân Şerîfe Zübeyde ve Fatma Hatunlardan her biri kendi vakıflarından olmak üzere mu‘accele-i misliyeleriyle âhara îcârlarına mumâna‘at etmemek üzre müvekkil-i mûmâileyh içün vekîl-i mezbûr İbrahim Efendi’ye mahallinde tenbîh eylediklerini mevlânâ-yı mezbûrân ma‘an mürsel ümenâ-i şer‘le meclis-i şer‘a ba‘de’l-inhâ İstanbul Mahkemesi’nden huzûr-ı âlîlerine i‘lâm olundu. Fî 21 min Şevvâl sene 1202.