İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 186 Hüküm no: 191 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrâf Agob v. Anbarsom, tasarrufu kendisine ait arsayı mütevelli oluruyla Eline bt. Agob’a feragat eylediği Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel Bâşkâtib Ahmed Efendi ve hâssa mi‘mârı hulefâsından el-Hâc Ahmed ve Süleyman Halîfeler ile İstanbul’da Fenarkapısı dâhilinde Tahtaminâre mahallesinde vâki‘ derûn-ı arzuhâlde mezkûretü’l-ism Eline bt. Agob nâm Nasrâniye’nin menziline varıp mahalle-i mezbûre imâmı Ahmed Efendi ve Müezzin İsmail Efendi ve el-Hâc İbrahim Ağa ve Câbî Abdullah Efendi ve Yorgânî Ahmed Ağa ve es-Seyyid İbrahim Odabaşı ve İsmail Çavuş ve Kâtib Ahmed Efendi ve Kâtib Ali Efendi ve el-Hâc Mehmed Sadık Efendi ve Abdi Ağa vesâ’ir mazbûtü’l-esâmî Müslimîn huzûrlarında ba‘de akdi’l-meclis sâhib-i arzuhâl Sarrâf Agob v. Anbarsom nâm zimmî meclis-i ma‘kûd-ı mezkûrda zikri âtî vakfın mütevellisi Mustafa Efendi tarafından vekîli ve kâ’immakâmı ve dâmadı Hâfız Hasan Efendi hâzır olduğu hâlde şahsı mu‘arrefe mersûme Elsine Nasrâniye muvâcehesinde mersûme Eline Nasrâniye işbu yedimde olan bir kıt‘a temessük nâtık olduğu üzre merhûme Raziye Hatun Vakfı’ndan bi’l-icâreteyn tasarrufumda olan altı yüz elli zirâ‘ sed üzeri olan arsamdan iki tarafdan vakf-ı mezbûr mersûme Eline Nasrâniye tasarrufunda olan mahal ve bir tarafdan Çorbacı Mustafa Ağa menzili ve bir tarafdan vakf-ı mezbûrdan benim tasarrufumda olup müceddeden binâya mübâşeret eylediğim mahal ile mahdûd terbî‘an doksan sekiz zirâ‘ arsamı fuzûlî zabt etmek murâd etmekle kasr-ı yedine tenbîh olunmak matlûbumdur deyü da‘vâ mersûme Eline Nasrâniye dahî cevâbında arsa-i mezkûre vaz‘-ı yed murâd eylediğini ikrâr lâkin bundan akdem hâlik olan mersûm Agob zimmînin karındaşı zevcem Avanes zimmi helâkinden birkaç gün mukaddem arsa-i mahdûde-i mezkûreyi mutasarrıfı olan kimesneden iştirâ etmek üzre mukâvele ve mutasarrıfı olan kimesneye beş yüz guruş teslîm edip üzerine ferâğ etmeksizin zevcim mersûm hâlik olup âhar temessükler ile zevcim mersûmun tasarrufunda olan arsalar üç nefer evlâd-ı sıgârına intikâl etmekle vasîleri olduğuma binâ’en âhara ferâğa kıbel-i şer‘den me’zûne olup âhar arsalar hâlâ tasarrufumda olduğuna binâ’en merkûm Agob zimmînin iddi‘â eylediği mârrü’z-zikr doksan sekiz zirâ‘ arsa dahî tasarrufumda olmuş olur deyü eylediği def‘i meşrû‘a olmamağla beyinlerine muslihûn tavassut edip mersûm Agob zimmî mârrü’z-zikr arsanın mersûme Eline Nasrâniye tasarrufunda olan arsa ittisâlinde tûlen on ve arzen bir buçuk terbî‘an on beş zirâ‘ arsayı bâ-re’y-i mütevellî mersûme Eline Nasrâniye’ye hüsn-ı rızâsıyla fâriğ oldukda mütevellî vekîl-i mezbûr dahî Nasrâniye-i mezbûrenin tasarrufuna ba‘de’l-izn husûs-ı mezbûra müte‘allika âmme-i da‘vâdan her biri âharın zimmetini ibrâ ve iskât ve her biri ber-vech-i muharrer âharın ibrâsını kabûl ve bu vecihle kat‘-ı münâza‘a eylediklerini mevlânâ-yı mezbûr mahallinde ketb ve tahrîr ve ma‘an mürsel ümenâ’-i şer‘le meclis-i şer‘a ba‘de’l-inhâ İstanbul Mahkemesi’nden huzûr-ı âlîlerine i‘lâm olundu. Fî 22 min Şevvâl sene 1202.