İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 188 Hüküm no: 193 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Mehmed’in, bir adet vakıf evin dörtte bir hissesinin vakıf tarafından Mustafa Efendi’ye feragatinin reddedilmesini talep ettiği Ma‘rûz Sâhibe-i arzuhâl ma‘rifetü’z-zât Rabia bt. Mehmed nâm hatun meclis-i şer‘-i şerîf-i enverde Hammâmî Mustafa Efendi b. Mehmed ile terâfu‘larında Receb Ağa Vakfı’ndan beher şehr kırk beşer akçe icâre-i mü’ecceleli İstanbul’da Yavaşca Şâhin mahallesinde vâki‘ beyne’l-ahâlî ve’l-cirân ma‘lûmü’l-hudûd ve’l-müştemilât bir bâb vakf menzilden bi’l-icâreteyn mutasarrıfe olduğum rub‘ hissemi ammim Mehmed nâm kimesne fuzûlî bâ-re’y-i mütevellî mezbûr Mustafa Efendi’ye ferâğ edip lâkin bize ferâğ-ı mezkûru mücîze olmamamla rub‘ hisse-i mezkûreyi bâ-re’y-i mütevellî istirdâd ederim deyü ba‘de’d-da‘vâ ve’l-istintâk mezbûr Mustafa Efendi cevâbında müdde‘iyye-i mezbûre târîh-i i‘lâmdan kırk yedi gün mukaddem huzûr-ı şer‘de mütevellî-i vakf Abdullah Efendi tarafından vekîl-i câbî-i vakf İsmail Efendi hâzır olduğu hâlde husûs-ı mezkûru bi-aynihî da‘vâ ve ben dahî bin iki yüz iki senesi Rebî‘ü’l-âhiri’nin ikinci günü rub‘ hisse-i mezkûreyi bi’n-nefs müdde‘iyye-i mezbûre doksan guruş bedel-i makbûz mukâbelesinde bâ-re’y-i mütevellî bana kat‘iyyen fâriga olmuşdu deyü da‘vâ-yı def‘imi mezbûre Rabia münkire olmağla şuhûd-ı udûl ile muvâcehesinde vech-i şer‘î üzere beyân ve isbât eylediğimden sonra def‘an li’n-nizâ‘ ve kat‘en li’l-husûme mâlımdan teberru‘an müdde‘iyye-i mezbûreye on guruş def‘ ve teslîm ol dahî kabz ve menzil-i mezkûra müte‘âllika da‘vâdan zimmetimi ibrâ ve iskāt ben dahî kabûl etmişidim deyü mezbûr Mustafa Efendi eylediği mazmûnunu ba‘de’l-inkâr udûlden el-Hâc Abbas b. Ahmed ve Ebubekir b. el-Hâc Abdullah şehâdetleriyle muvâcehesinde isbât etmeğin mûcebince müdde‘iyye-i mezbûre da‘vâ-yı mezkûresiyle mezbûr Mustafa Efendi’ye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 27 min L. sene 1202.