İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 189 Hüküm no: 194 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Vasil’in, Boğdan Sayıcısı Savilaki’den alacağını talep ettiği Ma‘rûz Sâdır olan fermân-ı âlîlerine imtisâlen arzuhâl eden Tanaş v. Vasil nâm zimmî Çarşamba günü Dîvân-ı âlîleri’nde ba‘dehû dâ‘îhânede ma‘kûd meclis-i şer‘-i münîrde derûn-ı arzuhâlde mezkûr Boğdan Sayıcısı Savilaki v. İlya nâm zimmî ile terâfu‘larında mersûm Savilaki zimmî ile beynimizde cârî cihet-i karz-ı şer‘îden olan cemî‘ ahz u i‘tâmızın hesâbı sahîhan rü’yet olundukda zimmetinde bâkî dokuz bin on bir guruş alacak hakkım zuhûr etmeğin ben bin iki yüz iki senesi Şa‘bânü’l-mu‘azzam’ın ikinci günü meblağ-ı bâkî-i mezkûr dokuz bin on bir guruş alıp ( ) Mahkemesi’nde hâkimü’ş-şer‘ olan es-Seyyid Ahmed Efendi huzûrunda mersûm Savilaki zimmîden taleb ve da‘vâ ol dahî hesâbımız hesâb-ı sahîh ile hesâb olunup zimmetde karzdan bâkî dokuz bin on beş guruş edâsı vâcib deyni olduğunu kat‘iyyen ikrâr ve i‘tirâf etmekle mûcebince meblağ-ı mezkûr dokuz bin on bir guruşu bana edâya mersûm Savilaki zimmîye ba‘de’t-tenbîh ve’l-i‘lâm mersûm Savilaki zimmetinde bana mahkûmun bih edâsı vâcib deyin olan meblağ-ı mezkûr dokuz bin on bir guruşdan bin beş yüz guruşunu bi’l-ihâle edâ bâkî yedi bin beş yüz on bir guruşu hâlâ zimmetinde kalmağla taleb ederim deyü bir kıt‘a i‘lâm-ı şer‘î ibrâzıyla ba‘de’d-da‘vâ ve’l-istintâk mersûm Savilaki zimmî cevâbında müdde‘î-i mezbûrun bi’l-cümle takrîr-i meşrûhunu ve ibrâz eylediği i‘lâm-ı [52a] şer‘înin mazmûnunu ikrâr ve i‘tirâf edip ba‘de’l-hükm ikrâr-ı mezkûr muvâza‘aten olmuşdur deyü tasaddî eylediği ref‘i meşrû‘a ve iltifâta şâyân olmamağın alâ mûcib-i ikrârihî meblağ-ı bâkî-i mezkûr yedi bin beş yüz on bir guruş müdde‘î-i mersûm Tanaş zimmîye edâ ve teslîme mersûm Savilaki zimmîye tekrâren tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî Şevvâl sene 1202.