İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 189 Hüküm no: 195 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ebubekir’in çörekçi dükkanı gedik hissesini sattığı Hüseyin’e açtığı davanın reddolunduğu Ma‘rûz Arzuhâl eden es-Seyyid Ebubekir meclis-i şer‘-i şerîf-i enverde çörekci esnâfından derûn-ı arzuhâlde mezkûrü’l-ism Hüseyin ile terâfu‘larında karındaşım müteveffâ çörekci el-Hâc es-Seyyid Mehmed’in hasren vârisi olmamla terekesi ma‘rifet-i şer‘le tahrîr olunduğu esnâda İstanbul’da İskilib Hânı kurbünde vâki‘ ma‘lûmü’l-hudûd bir bâb çörekci dükkânı derûnunda mevcûde gedik ta‘bîr olunur âlât-ı lâzımenin rub‘ hissesi karındaşım müteveffâ-yı mezbûrun ile’l-vefât mülkü ve ba‘de vefâtihî bana mevrûs olmağla rub‘ hisse-i mezkûreyi bey‘ murâd ettiğimde esnâf-ı mezbûre kethüdâsı ve ustaları kassâm-ı askerî huzûrunda meclis-i şer‘de hisse-i mezkûrenin elyevm semeni misli bin guruşdur deyü haber vermeleriyle ben dahî hisse-i mezkûreyi alât-ı mezkûreden hisse-i ma‘lûmeye mutasarrıf olan işbu merkûm Hüseyin’e bin guruşa bey‘-i bâtt-ı sahih-i şer‘î ile bey‘ ve temlîk ol dahî iştirâ ve temellük ve kabûl ve semeni mezkûru yedinden tamâmen kabz ve hisse-i mezkûreye müte‘allika da‘vâdan zimmetini ibrâ etmişdim lâkin âlât-ı mezkûre ol târîhde bin guruşdan ziyâde semene mütehammil olup mücerred kethüdâ ve ustalar bahâsı bin guruşdur demeleriyle mezbûra bey‘ etmemle hisse-i mezkûrenin değer bahâsını tekmîl eylesün yâhûd verdiği bin guruşu alıp hisse-i mezkûreyi bana teslîm eylesin deyü tasaddî eylediği da‘vâsı takrîr-i meşrûha üzre meşrû‘a ve iltifâta şâyân olmamağın müdde‘î-i mezbûr es-Seyyid Ebubekir da‘vâ-yı mezkûresiyle merkûm Hüseyin’e bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 27 min Şevvâl sene 1202.