İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 190 Hüküm no: 196 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko v. Kiro’nun kasap dükkanı gedik hisse ve aletlerini Nikola v. Diyoro’ya sattığı Ma‘rûz Evkâf-ı hümâyûn-ı hazret-i şehriyârîden Dördüncü Selhhâne’ye merbût Yeniköy’de vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzımenin nısfına mütevellî-i vakf temessüküyle mutasarrıf Liko v. Kiro nâm zimmî tarafından husûs-ı âtîde vekîl olduğu Kosti v. Preşkova ve Pano v. Duka nâm zimmîler şehâdetleriyle zâhir olan Kosta v. Nako nâm zimmî meclis-i şer‘-i şerîf-i enverde hâlâ Kasabbaşı Mehmed Emin Ağa tarafından vekîli kasab kethüdâsı el-Hâc Ali Ağa ve ustalardan Mehmed Said Ağa hâzır olduğu hâlde Nikola v. Diyoro nâm zimmî muvâcehesinde takrîr-i kelâm edip müvekkilim mersûm mutasarrıf olduğu nısf alât-ı mezkûreyi hüsn-ı rızâ ve tayyib-i ihtiyâriyle kasab ustası olduğu hâzırûn-ı merkûmûn haberleriyle zâhir olan mersûm Nikola zimmîye bedel-i ma‘lûm ve makbûz mukâbelesinde ferâğ ve tefvîz ol dahî tefevvüz ve kabûl edip ba‘de’l-yevm nısf alât-ı mezkûrede müvekkilim mersûmun kat‘an alâkası kalmayıp mersûm Nikola zimmînin hakk-ı mufavvazı olmuşdur dedikde gıbbe’t-tasdîk mersûm Nikola zimmî nısf alât-ı mezkûre defter-i vakfda kendi üzerine müceddeden kayd ve yedine müceddeden temessük i‘tâ olunmak ricâsında olduğu İstanbul Mahkemesi’nden huzûr-ı âlîlerine i‘lâm olundu. Fî 28 Şevvâl sene 1202.