İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 191 Hüküm no: 197 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmet b. Ali’nin kasap dükkanı gedik hissesini, es-Seyyid Halil’e feragat ettiği Ma‘rûz Evkâf-ı hümâyûn-ı hazret-i şehriyârîden Dokuzuncu Selhhâne’ye merbût olup medîne-i Üsküdar’da Atpazarı kurbünde sebzeciye muttasıl bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzımenin mecmû‘una mütevellî-i vakf temessüküyle mutasarrıf olan Ahmed b. Ali tarafından vekîl olduğu es-Seyyid Mustafa b. es-Seyyid İbrahim ve Mehmed b. el-Hâc İsmail şehâdetleriyle sâbit olan Hüseyin b. Mehmed meclis-i şer‘-i şerîf-i enverde hâlâ Kasabbaşı Mehmed Emin Ağa tarafından vekîli kasab kethüdâsı el-Hâc Ali Ağa ve ustalar hâzır oldukları hâlde Bostânî es-Seyyid Halil b. es-Seyyid Ebubekir mahzarında takrîr-i kelâm edip müvekkilem makbûz mukâbilesinde merkûm Bostânî es-Seyyid Halil’e ferâğ ve tefvîz ol dahî tefevvüz ve kabûl edip ba‘de’l-yevm âlât-ı lâzıme-i mezkûrede müvekkilim mezbûrun aslâ alâka ve medhali kalmayıp merkûm es-Seyyid Halil’in hakk-ı mufavvazı olmuşdur dedikde gıbbe’t-tasdîk merkûm Bostânî es-Seyyid Halil âlât-ı mezkûre defter-i vakfa kendi üzerine kayd ve yedine temessük i‘tâ olunmak ricâsında olduğu İstanbul Mahkemesi’nden huzûr-ı âlîlerine i‘lâm olundu. Fî 2 min Zilka‘de sene 1202.