İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 192 Hüküm no: 199 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar taifesinin İstanbul’a dikilmiş çetik getirmesinin yasak olduğu getirenlerin cezalandırılacağı Ma‘rûz İstanbul’da Pîrîpaşa Hânı’nda sâkin Kayseriye tüccârından Debbâğ el-Hâc Mehmed Ağa b. el-Hâc Ebubekir meclis-i şer‘-i şerîf-i enverde Dikicibaşı es-Seyyid Osman Ağa ve Yiğitbaşısı Mehmed Ağa hâzır oldukları hâlde dikici esnâfından olup Vâlide Hânı’nda sâkin çetikci ustalarının kethüdâları es-Seyyid Mehmed ve yiğitbaşıları Mahmud ve ustalarından el-Hâc Süleyman Ağa ve es-Seyyid Hasan Usta ve es-Seyyid Ahmed Usta ve diğer es-Seyyid Ahmed Usta ve İbrahim Usta ve Hasan Usta muvâcehelerinde ta‘bîr ani’l-merâm edip ben mârrü’l-beyân Kayseriye’de debbâğ olmamla Âsitâne-i aliyye’ye sahtiyân getirip dikici esnâfına bey‘ eder tâcir zümresinden olduğuma binâ’en bu sene-i mübârekede dikilmiş çetik dahi getirip bey‘ etmek murâd ettiğimde çetikci ustaları taşradan Âsitâne-i aliyye’ye dikilmiş çetik gelmek memnû‘ olup bize muzır ve kâr-ı kesbimize mâni‘ ve muzırdır deyü beni men‘ etmeleriyle ben dahî fîmâ ba‘d me’lûf olduğum sahtiyân mübâya‘ası ticâretime kâni‘ olup ba‘de’l-yevm taşradan Âsitâne-i aliyye’ye aslâ ve kat‘â dikilmiş çetik getirmemeğe cezm ve ta‘ahhüd eyledim deyü eylediği takrîr-i meşrûhu çetikci esnâfı kethüdâsı ve hâzırûn-ı merkûmûn ustaları iltimâsları İstanbul Mahkemesi’nden huzûr-ı âlîlerine i‘lâm olundu. Fî gurre-i Zilka‘de sene 1202.