İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 192 Hüküm no: 200 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakalar için dikilen kırbaların küçük imal edilmemesi ve edilenlerin kullanılmasının yasak olduğu Ma‘rûz Âsitâne-i aliyye’de sakabaşı olan Hüseyin Ağa ve arka sakaları bölükbaşılarından İbrahim ve Mahmud ve Hasan ve Mehmed ve diğer Hasan ve Hüseyin ve Ahmed ve Ebubekir ve es-Seyyid Süleyman ve Ali ve Feyzullah ve es-Seyyid Mehmed ve diğer Süleyman ve es-Seyyid Mehmed Sadık ve Mustafa nâm bölükbaşıları meclis-i şer‘-i şerîf-i enverde her biri takrîr-i kelâm edip işbu arzuhâl hâmişinde muharrer sicill-i mahfûzdan muhrec derkenâr nâtık olduğu üzre bin yüz yetmiş beş senesinde İstanbul kadısı olan Mehmed Murad Efendi’nin zamân-ı hükûmetinde arka sakalarının isti‘mâl eyledikleri kırbaları sagîr olup ancak on beş vakıyye suya mütehammil olduğu bi’l-iştikâ zâhir olmağın nef‘an li’l-ibâd ve beher kırba otuz vakıyye su almak üzre tertîb-i şurût olunup nizâm-ı mezkûr düstûrü’l-amel olup hilâfıyla hareket olunmamasıçün bâ-i‘lâm yedimize tuğrâlı emr-i âlî i‘tâ olunmuşidi lâkin emr-i âlî-i mezkûr bir takrîb zâyi‘ olmağın hilâf-ı emr-i alî ve muğâyir-i şurût hareket edenleri te’dîb murâd eylediğimizde bize muhâlefet etmeleriyle nef‘an li’l-ibâd ve kemâ fi’s-sâbık otuzar vakıyye su alır kırba isti‘mâl olunmak üzre kıbel-i şer‘den tenbîh ve nizâm-ı mezkûrun te’yîd ve te’kîdi içün yedlerine müceddeden bir kıt‘a tuğrâlı emr-i âlî ihsân buyurulmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî gurre-i Zilka‘de sene 1202.